పారామెడికల్ సిబ్బందితో మంత్రి దానం నాగేందర్ చర్చలు సఫలం

హైదరాబాద్: పారామెడికల్ ఉద్యోగులకు, ఆరోగ్యశాఖ మంత్రి దానం నాగేందర్ కు మధ్య జరిగిన చర్చలు గురువారం సఫలమయ్యాయి. కోఠీలోని హెల్తు డైరెక్టర్ వద్ద ఆందోళన నిర్వహిస్తున్న ఉద్యోగులతో మంత్రి చర్చలు జరిపారు. ఉద్యోగులను క్రమబద్దీకరించేందుకు మంత్రి హామీ ఇవ్వడంతో వారు ఆందోళన విరమించారు. వారం రోజుల్లో క్రమబద్దీకరణ చేస్తామని మంత్రి హామీ ఇచ్చారు. తమకు ఎనిమిది నెలలుగా జీతాలు ఇవ్వడం లేదని వారు మంత్రికి గుర్తు చేయగా, నాలుగు రోజుల్లో ఎనిమిది నెలల జీతాలు ఇస్తామని చెప్పారు. కాగా మంత్రితో జరిగిన చర్చలను పారామెడికల్ నాయకులు అంగీకరించినప్పటికీ సిబ్బంది అంగీకరించలేదని సమాచారం. నాయకులతో విబేధించిన సిబ్బంది ఆందోళన కొనసాగిస్తున్నట్టు సమాచారం.

తనతో పాటు ప్రభుత్వం కూడా పారా మెడికల్ ఉద్యోగుల సమస్యలపట్ల సానుకూలంగానే ఉందని చెప్పారు. తాను సానుకూలంగా ఉన్నందునే రెండుసార్లు మిమ్మల్ని ముఖ్యమంత్రితో కలిపించానని చెప్పారు. ఇప్పుడు కూడా అందుకే వచ్చానని చెప్పారు. వారం రోజులుగా ముఖ్యమంత్రికి వివిధ కార్యక్రమాలు ఉండటం వల్ల కుదరలేదన్నారు. మీరు ఆవేశపడి మాట్లాడితే మేమేం చేయలేమని అయితే అన్ని విధాలుగా క్రమబద్దీకరించేందుకు మాత్రం సిద్ధంగా ఉన్నట్లు చెప్పారు. మీకు నేను సపోర్టు చేయకపోతే ఇంకెవరూ చేయరని ఆయన సిబ్బందికి సూచించారు.