లగడపాటికి ఏం తెలుసని మాట్లాడుతున్నారు: జీవన్ రెడ్డి

హైదరాబాద్: ఎస్ఐ నియామకాలపై ఆంధ్రప్రదేశ్ ప్రభుత్వానికి స్పష్టమైన వైఖరి లేదని మాజీ మంత్రి జీవన్ రెడ్డి విమర్శించారు. హైదరాబాదు 6వ జోన్లో ఉందా లేదా అనేది తేలకుంటా పరీక్షలు ఎలా నిర్వహిస్తారని ఆయన ధ్వజమెత్తారు. సుప్రీంకోర్టు తీర్పు ప్రకారం హైదరాబాదు ఫ్రీజోన్లో లేదని, అయితే ప్రభుత్వం మాత్రం సిక్త్ జోన్ పరిధి పేరుతో ఉద్యోగాలను భర్తీ చేస్తామనటం కోర్టు తీర్పుకు వ్యతిరేకం కాదా అని ఆయన ప్రశ్నించారు. కోర్టు తీర్పు సిక్త్స్ జోన్ కు వ్యతిరేకం ఉంటే కోర్టు తీర్పు ప్రకారం వెళతామన్న ప్రభుత్వం ఎలా వెళుతుందని ఆయన ప్రశ్నించారు.

విజయవాడ పార్లమెంటు సభ్యుడు లగడపాటి రాజగోపాల్ కి ఏం తెలుసని మాట్లాడుతున్నారని ఆయన ధ్వజమెత్తారు. సగానికంటే ఎక్కువ పోస్టులు తెలంగాణకే కేటాయిస్తున్నారనటం ఆయన అవివేకానికి నిదర్శనమన్నారు. లగడపాటి వ్యాఖ్యలు పుండుమీద కారం చల్లినట్టు ఉందన్నారు. ఉస్మానియా విశ్వవిద్యాలయ విద్యార్థులకు ఉన్న లౌక్యం ప్రభుత్వానికి లేదని విమర్శించారు. ఎస్ఐ పోస్టుల భర్తీని ఆపుతారా లేదంటే తెలంగాణకు అన్యాయం చేసేందుకు సిద్ధమని చెప్పి రాత పరీక్షలను కొనసాగించండి. అప్పుడు మా సత్తా మేం చూపుతామంటూ ఆయన మండిపడ్డారు.