పారామెడికల్ సిబ్బందిని క్రమబద్దీకరిస్తాం: మంత్రి దానం హామీ

హైదరాబాద్: ఉద్యోగాలను క్రమబద్దీకరించేందుకు ప్రభుత్వం కట్టుబడి ఉందని ఆరోగ్యశాఖ మంత్రి దానం నాగేందర్ గురువారం పారా మెడికల్ విద్యార్థులకు హామీ ఇచ్చారు. తనతో పాటు ప్రభుత్వం కూడా పారా మెడికల్ ఉద్యోగుల సమస్యలపట్ల సానుకూలంగానే ఉందని చెప్పారు. తాను సానుకూలంగా ఉన్నందునే రెండుసార్లు మిమ్మల్ని ముఖ్యమంత్రితో కలిపించానని చెప్పారు. ఇప్పుడు కూడా అందుకే వచ్చానని చెప్పారు. వారం రోజులుగా ముఖ్యమంత్రికి వివిధ కార్యక్రమాలు ఉండటం వల్ల కుదరలేదన్నారు. మీరు ఆవేశపడి మాట్లాడితే మేమేం చేయలేమని అయితే అన్ని విధాలుగా క్రమబద్దీకరించేందుకు మాత్రం సిద్ధంగా ఉన్నట్లు చెప్పారు. మీకు నేను సపోర్టు చేయకపోతే ఇంకెవరూ చేయరని ఆయన సిబ్బందికి సూచించారు.

అయితే ఈ రోజు మధ్యాహ్నం 12 గంటలలోగా క్రమబద్దీకరణ జీవో జారీ చేయాలని పారామెడికల్ సిబ్బంది దానం నాగేందర్ కు ఆల్టిమేటం జారీ చేశారు. జీవో వెంటనే జారీ చేయాలంటే ఎలా కుదురుతుందని దానికో పద్ధతి ఉంటుందని ఆయన చెప్పారు. ఈ విషయమై కోర్టులో కొన్ని పెండింగ్ కేసులు ఉన్నాయని వాటిని తొలగించి క్రమబద్దీకరణకు ప్రభుత్వం పూనుకుంటుందని చెప్పారు.