రాళ్లదాడి మా పని కాదు, మఫ్టీలోని పోలీసులది: ఓయు జేఏసి

హైదరాబాద్: దుకాణాలు, థియేటరుపై రాళ్లతో దాడులు చేసింది మేం కాదని ఉస్మానియా విశ్వవిద్యాలయం ఐక్య కార్యాచరణ సమితి (ఓయు జెఏసి) గురువారం సాయంత్రం ప్రకటన చేసింది. మఫ్టీలో ఉన్నపోలీసులే దాడి చేసి విద్యార్థులపై అభాండం వేస్తున్నారన్నారు. రాళ్ల దాడితో తమకెలాంటి సంబంధం లేదన్నారు. ఫ్రీజోన్ విషయం తేలేవరకు ఎస్ఐ పోస్టుల భర్తీని ఆపాలని తాము చేస్తున్న ఉద్యామాన్ని దెబ్బతీయడానికే పోలీసులు ఇలాంటి కుట్రపూరితమైన చర్యలకు పూనుకుంటుందన్నారు.

పోలీసులు ఇలాంటి చర్యలకు మరోసారి పాల్పడితే తీవ్ర చర్యలుంటాయని వారు అన్నారు. మాపైన పోలీసులే దాడి చేశారని పేర్కొన్నారు. ప్రీజోన్ అంశంపై ప్రభుత్వం సాయంత్రంలోగా తన ప్రకటనను వెలిబుచ్చాలని డిమాండ్ చేశారు. లేదంటే తాము తదుపరి కార్యాచరణ రూపొందిస్తామన్నారు. కాగా, సికింద్రాబాదులో రాస్తారోకోకు దిగిన తెలంగాణ రాష్ట్ర సమితి (తెరాస) శాసనసభ్యులు హరీష్ రావు, ఈటెల రాజేందర్ లను పోలీసులు అరెస్టు చేశారు.