ఓయు విద్యార్థులపై ప్రభుత్వం చర్యలు తీసుకోవాలి: రాయపాటి

ఢిల్లీ: తెలంగాణలో విద్యార్థులు చేస్తున్న ఆందోళనలపై ప్రభుత్వం వెంటనే చర్యలు తీసుకోవాలని గుంటూరు పార్లమెంటు సభ్యుడు రాయపాటి సాంబశివరావు ప్రభుత్వాన్ని గురువారం డిమాండ్ చేశారు. తెలంగాణపై కేంద్రం వేసిన శ్రీకృష్ణ కమిటీ నిర్ణయానికి అందరూ కట్టుబడి ఉండాలని ఆయన అన్నారు. శ్రీకృష్ణ కమిటీ త్వరలో తమ నివేదికను సమర్పించనుందని ఈ సమయంలో అందరూ శాంతియుతంగా ఉండాలన్నారు.

అనవసర ఆందోళనలు సృష్టించకూడదని చెప్పారు. రాష్ట్రంలో ముఖ్యమంత్రి కొణిజేటి రోశయ్యను మార్చాల్సిన అవసరం లేదని ఆయన తన అభిప్రాయం వ్యక్తం చేశారు. రాయపాటి సాంబశివరావు పార్లమెంటు సమావేశాల కోసం న్యూడిల్లీలో ఉన్నారు. ఆయన అక్కడ విలేకరులతో మాట్లాడారు.