మొదట పోలీసులే విద్యార్థులను రెచ్చగొట్టారు: ఎమ్మెల్యే శంకరరావు

హైదరాబాద్: ఫ్రీజోన్ అంశం తేలే వరకు ఎస్ఐ రాత పరీక్షలు రద్దు చేయాలంటూ శాంతియుతంగా ధర్నా చేస్తున్న విద్యార్థులను మొదట రెచ్చగొట్టింది పోలీసులేనని కంటోన్మెంటు శాసనసభ్యుడు శంకరరావు గురువారం అన్నారు. పోలీసులు చేస్తున్న చర్యలవల్ల ప్రభుత్వానికి, కాంగ్రెస్ పార్టీకి చెడ్డపేరు వస్తుందని ఆయన ధ్వజమెత్తారు. విద్యార్థులపై పోలీసులు లాఠీఛార్జి చేయటం అవమానమని, అమానుషమని అన్నారు. లాఠీఛార్జి చేసిన పోలీసులపై వెంటనే చర్యలు తీసుకోవాలని ఆయన డిమాండ్ చేశారు.

ఎవరు చెబితే పోలీసులు ఇలా ప్రవర్తిస్తున్నారంటూ ఆయన అన్నారు. విద్యార్థులపై లాఠీఛార్జి చేసిన పోలీసులపై చర్యలకు తాను డిమాండ్ చేస్తున్నానన్నారు. ఎవరి వకాలతు తీసుకొని కొందరు తెలంగాణ గురించి మాట్లాడుతున్నారని విమర్శించారు. కాగా విద్యార్థులపై పోలీసుల లాఠీఛార్జిని భారతీయ జనతా పార్టీ సీనియర్ నాయకుడు విద్యాసాగరరావు ఖండించారు. విద్యార్థుల న్యాయమైన డిమాండ్లను ప్రభుత్వం వెంటనే ఆమోదించాలని డిమాండ్ చేశారు.