వైయస్ జగన్ విధేయులపై కాంగ్రెసు అధ్యక్షురాలు సోనియా గాంధీ ఆరా

న్యూఢిల్లీ: తమ పార్టీ కడప పార్లమెంటు సభ్యుడు వైయస్ జగన్ విధేయులపై కాంగ్రెసు అధ్యక్షురాలు సోనియా గాంధీ ఆరా తీస్తున్నట్లు సమాచారం. ముఖ్యమంత్రి కె. రోశయ్య సభల్లో వైయస్సార్ పేరుతో జగన్ విధేయులు హల్ చల్ చేస్తున్న నేపథ్యంలో ఆ వివరాలను ఆమె సేకరిస్తున్నట్లు చెబుతున్నారు. నిజానికి, ఆంధ్రప్రదేశ్ వ్యవహారాలు పార్టీ అధిష్టానం రోజువారీ ప్రాతిపదికపై పరిశీలిస్తోంది. సీమాంధ్రలోనే కాకుండా తెలంగాణలోనూ జగన్ అనుచరులు చేస్తున్న గొడవలు పార్టీ అధిష్టానం దృష్టిని ఆకర్షిస్తున్నట్లు సమాచారం.

కాంగ్రెసు పార్టీని కాదని వారంతా తిరిగి జగన్ వైపు వెళ్తారా అనే విషయాన్ని తేల్చి చెప్పాలని సోనియా రాష్ట్ర నాయకులను కొంత మందిని అడిగినట్లు తెలుస్తోంది. విశాఖపట్నం, విజయవాడ వంటి చోట్లనే కాకుండా తెలంగాణలోని భువనగిరి, మహబూబ్ నగర్ వంటి చోట్ల కూడా వైయస్ జగన్ అనుచరులు కాంగ్రెసు, ముఖ్యమంత్రి సభల్లో గొడవ చేస్తుండడాన్ని సోనియా ప్రత్యేకంగా పరిశీలిస్తున్నట్లు సమాచారం.