కాంగ్రెసు ఉత్సవాల్లో మహిళల ఒంపుసొంపుల సినిమా నృత్యాలు

హైదరాబాద్: కాంగ్రెసు 125 ఏళ్ల ఉత్సవాల్లో కొన్ని సాంస్కృతిక కార్యక్రమాలు తీవ్ర వివాదానికి కారణమయ్యాయి. కాంగ్రెసు సంస్కృతి ఇదేనా అంటూ ప్రశ్నలు వస్తున్నాయి. హైదరాబాదులోని రవీంద్ర భారతిలో ఏర్పాటు చేసిన 125 కాంగ్రెసు ఉత్సవాల్లో ప్రదర్సించిన నృత్యాలు తీవ్ర విమర్శకు గురవుతున్నాయి. సినిమా పాటలకు మహిళా డ్యాన్సర్లు ఒంపు సొంపులు ప్రదర్శిస్తూ నృత్యాలు చేశారు. ఒక రకంగా అందరినీ ఇబ్బంది పెట్టే విధంగా ఆ నృత్యాలున్నాయి. అదే సమయంలో మరో కార్యక్రమం కూడా వివాదానికి కారణమైంది. మహాత్మా గాంధీ వేషధారితో కాంగ్రెసు దివంగత నేతలపై, ప్రస్తుత నేతలపై ప్రశంసల వర్షం కురిపించారు. గాంధీ వారిని కొనియాడుతున్నట్లు ప్రదర్శన ఇప్పించారు.

వాటిని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ చిన్న విషయాలుగా కొట్టిపారేశారు. మంత్రి, గ్రేటర్ హైదరాబాదు కాంగ్రెసు అధ్యక్షుడు దానం నాగేందర్ రవీంద్ర భారతిలో కాంగ్రెసు 125 ఏళ్ల ఉత్సవాలకు చేసిన ఏర్పాట్లను ఆయన కొనియాడారు. మిగతా విషయాలను చిన్న పొరపాట్లుగా ఆయన కొట్టిపారేశారు.