ఫ్రీజోన్ వ్యవహారంపై మీడియా వద్ద చంద్రబాబు రుసరుసలు

విశాఖపట్నం: హైదరాబాద్ ఫ్రీజోన్ వ్యవహారంపై సమాధానం ఇవ్వడానికి తెలుగుదేశం పార్టీ అధ్యక్షుడు నారా చంద్రబాబ నాయుడు నిరాకరించారు. విశాఖపట్నం జిల్లా పర్యటనలో ఉన్న చంద్రబాబు శనివారం మీడియా ప్రతినిధులతో మాట్లాడారు. హైదరాబాద్ ఫ్రీజోన్ వ్యవహారంపై మీడియా ప్రతినిధులు వేసిన ప్రశ్నకు ఆయన రుసరుసలాడుతూ వెళ్లిపోయారు. కాంగ్రెసు అవినీతిపై ఆయన మీడియా ప్రతినిధుల సమావేశంలో తీవ్రంగా ధ్వజమెత్తారు. 2జి స్పెక్ట్రమ్ కుంభకోణానికి బాధ్యత వహించి ప్రధాని మన్మోహన్ సింగ్ తప్పుకోవాలని ఆయన డిమాండ్ చేశారు. కుంభకోణం గురించి తనకు తెలియదని ప్రధాని అనడం సిగ్గుచేటు అని ఆయన వ్యాఖ్యానించారు.

వ్యక్తిగత ఆస్తులు పెంచుకోవడానికే కాంగ్రెసు నాయకులు ప్రయత్నిస్తున్నారని, ఇది దేశానికి శాపంగా మారిందని ఆయన అన్నారు. తవ్వుతున్న కొద్దీ కోట్లాది రూపాయల కుంభకోణాలు వెలికి వస్తున్నాయని ఆయన అన్నారు. స్పెక్ట్రమ్ కుంభకోణంపై ప్రధాని తప్పించుకోవడానికి వీలు లేదని ఆయన అన్నారు. మంత్రివర్గం పూర్తిగా బాధ్యత వహించాల్సి ఉంటుందని ఆయన అన్నారు.