తిరగబడుతున్న చంద్రబాబు నాయుడి రెండు కళ్ల సిద్ధాంతం

హైదరాబాద్: తన రెండు కళ్ల సిద్ధాంతం తెలుగుదేశం పార్టీ అధ్యక్షుడు నారా చంద్రబాబునాయుడికి ఎప్పటికప్పుడు ఇబ్బందులు తెచ్చి పెడుతూనే ఉంది. తెలుగుదేశం నాయకులు కూడా తీవ్ర ఇబ్బందులు పడుతున్నారు. ఏం మాట్లాడాలో తెలియక మీడియాకు దూరంగా ఉంటున్నారు. ప్రభుత్వం నిర్వహించిన అఖిల పక్ష సమావేశాల్లో ఓ మాట, బయట మరో మాట చెప్పలేక ఇబ్బందులు పడుతున్నారు. నిరుడు డిసెంబర్ 7వ తేదీన ముఖ్యమంత్రి రోశయ్య ఏర్పాటు చేసిన అఖిల పక్ష సమావేశంలో శాసనసభలో తెలంగాణ రాష్ట్ర ఏర్పాటుకు తీర్మానం పెడితే సమర్థిస్తామని పార్టీ వైఖరిగా తెలుగుదేశం నాయకులు చెప్పారు. తీరా, తెలంగాణ రాష్ట్ర ఏర్పాటుకు ప్రక్రియ ప్రారంభిస్తున్నట్లు కేంద్ర హోం మంత్రి పి. చిదంబరం ప్రకటించగానే మాట మార్చాల్సిన పరిస్థితి చంద్రబాబుకు ఏర్పడింది. పార్టీలోని సీమాంధ్ర నాయకుల నుంచి వచ్చిన ఒత్తిళ్లను తట్టుకోలేకనో, తనకే ఇష్టం లేకనో అందుకు విరుద్ధంగా వ్యవహరించాల్సి వచ్చింది. దాంతో రాష్ట్ర విభజన అనే అతి పెద్ద సమస్యను రాత్రికి రాత్రి ప్రకటించడం సరి కాదని మెలిక పెట్టారు.

తాజాగా, హైదరాబాదును ఆరో జోన్ పరిధిలోకి తేవడానికి రాష్ట్రపతి ఉత్తర్వులోని 14ఎఫ్ నిబంధనను తొలగించడానికి చర్యలు తీసుకోవాలని కోరుతూ శాసనసభలో ప్రతిపాదించిన తీర్మానాన్ని తెలుగుదేశం పార్టీ సమర్థించింది. ఎస్సై రాత పరీక్షలపై తెలంగాణలో ఆందోళన తలెత్తిన నేపథ్యంలో ప్రభుత్వం ఏర్పాటు చేసిన అఖిల పక్ష సమావేశానికి తెలుగుదేశం నాయకులు హాజరై కేంద్ర ప్రభుత్వం చర్యలు తీసుకునే వరకు పరీక్షలను వాయిదా వేయాలని కోరారు. ప్రభుత్వం పరీక్షను వాయిదా వేయడంతో మళ్లీ చంద్రబాబు ఇరకాటంలో పడ్డారు. అందుకే, హైదరాబాదు ఫ్రీజోన్ అంశంపై మీడియా ప్రతినిధులు శనివారం విశాఖపట్నంలో ప్రశ్నిస్తే ఆయన రుసరుసలాడారు. పార్టీ సీమాంధ్ర నాయకులు కూడా ఏమీ మాట్లాడలేకపోతున్నారు. ప్రభుత్వాన్ని ఏదో విధంగా విమర్శించే ప్రయత్నం మాత్రమే సీమాంధ్ర తెలుగుదేశం నాయకులు చేస్తున్నారు. అసెంబ్లీ తీర్మానంపై ఓ టీవీ చానెల్ లో తెలంగాణ రాష్ట్ర సమితి (తెరాస) నాయకుడు శ్రవణ్ వేసిన ప్రశ్నకు దేవినేని ఉమామహేశ్వర రావు సమాధానం చెప్పలేక ప్రభుత్వాన్ని విమర్శించేందుకు ప్రయత్నించారు. కె. ఎర్రంనాయుడు కూడా మాట వరుసకు మాట్లాడి ప్రభుత్వాన్ని తప్పు పట్టారు.