వైయస్ జగన్ కు కౌంటర్: వైయస్, సోనియాలపై డిఎస్ ప్రశంసలు

హైదరాబాద్: తమ పార్టీ కడప పార్లమెంటు సభ్యుడు వైయస్ జగన్ కు చెందిన సాక్షి దినపత్రిక, చానెళ్లలో సోనియా గాంధీకి వ్యతిరేకంగా వచ్చిన వార్తాకథనాలను తిప్పికొట్టడానికి ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ పరోక్ష పద్ధతిని ఎంచుకున్నారు. సోనియా గాంధీని, దివంగత నేత వైయస్ రాజశేఖర రెడ్డిని ప్రశంసలతో ముంచెత్తారు. సోనియా కాంగ్రెసు నాయకత్వం చేపట్టిన తర్వాత సాధించిన విజయాలేమిటో ఆయన శనివారం మీడియా ప్రతినిధుల సమావేశంలో వివరించారు. వైయస్సార్ గట్టి కాంగ్రెసు నాయకుడని ఆయన అన్నారు. వైయస్సార్ ఏనాడు కూడా కాంగ్రెసు తిరంగ జెండాను వదిలిపెట్టలేదని ఆయన అన్నారు. సుదీర్ఘమైన పాదయాత్ర చేసినప్పుడు కూడా తిరంగ జెండా చేతిలోనే ఉందని ఆయన చెప్పారు.

కాంగ్రెసు బలహీనపడిందనే వార్తల్లో నిజం లేదని ఆయన అన్నారు. సోనియా నాయకత్వం వల్లనే కాంగ్రెసు రెండోసారి అధికారంలోకి వచ్చిందని ఆయన చెప్పారు. సోనియాపై అవాకులు చెవాకులు రాయడం సరి కాదని ఆయన అన్నారు. సోనియా భారత్ కు సరైన నాయకత్వాన్ని అందిస్తున్నారని ఆయన కొనియాడారు. ముఖ్యమంత్రులకు ప్రోత్సాహం అందిస్తున్నారని చెప్పారు. సోనియా నాయకత్వంపై అందరికీ విశ్వాసం ఉందని ఆయన చెప్పారు. ప్రజల కోరిక మేరకే సోనియా గాంధీ కాంగ్రెసు పార్టీ నాయకత్వాన్ని చేపట్టారని ఆయన చెప్పారు.