హైకోర్టులో వైయస్ జగన్ కు చుక్కెదురు: విన్నపం తిరస్కరణ

హైదరాబాద్: ఐఎంజీ భూముల వ్యవహారంలో హైకోర్టు సుమోటోగా తీసుకున్న కోర్టు ధిక్కరణ కేసులో తనను తప్పించాలంటూ 'సాక్షి' ఛైర్మన్‌ వై.ఎస్‌.జగన్‌మోహన్‌రెడ్డి చేసిన అభ్యర్థనను హైకోర్టు తిరస్కరించింది. ఈ కేసు నుంచి తప్పించాలంటూ జగన్‌తోపాటు 'సాక్షి' ఎడిటోరియల్‌ డైరెక్టర్‌ ఎస్‌.రామకృష్ణారెడ్డి, ఇందిరా టెలివిజన్‌ సీఈవో ప్రియదర్శిని రామ్‌, ఐఎంజీ (బి) డైరెక్టర్‌ బిల్లీరావు అలియాస్‌ అహోబిలరావు అభ్యర్థనలను శుక్రవారం తోసిపుచ్చింది.

ఐఎంజీ భూముల వ్యవహారంపై 'బిల్లీ మెడలో బాబు గంట' శీర్షికతో 'సాక్షి' ప్రచురించిన కథనాన్ని హైకోర్టు సుమోటోగా విచారణకు తీసుకుని నోటీసులు జారీ చేసింది. అనంతరం ఈ కేసు నుంచి తప్పించాలంటూ జగన్‌ తదితరులు పెట్టుకున్న అనుబంధ పిటిషన్‌లపై విచారణ చేపట్టిన జస్టిస్‌ ఎ.గోపాల్‌రెడ్డి, జస్టిస్‌ కె.సి.భానులతో కూడిన ధర్మాసనం శుక్రవారం ఉత్తర్వులను వెలువరించింది. కోర్టు జారీ చేసిన నోటీసులకు ప్రతివాదులు స్పందించకుండా వారిని కేసు నుంచి మినహాయించడానికి ఎలాంటి కారణాలూ కోర్టు దృష్టికి రాలేదంది.