తెలుగుదేశం శాసనసభ్యుడు రఘునాథ రెడ్డి అరెస్టు

అనంతపురం: ఎస్సై రాత పరీక్ష వాయిదా వేయడాన్ని నిరసిస్తూ శ్రీకృష్ణదేవరాయ యూనివర్సిటీలో విద్యార్థులతో కలిసి ఆందోళన చేస్తున్న తెలుగుదేశం శాసనసభ్యుడు పల్లె రఘునాథరెడ్డిని పోలీసులు శనివారం అరెస్ట్ చేశారు. ఆయనతో పాటు 10 మంది విద్యార్థులను అదుపులోకి తీసుకున్నారు. ఎస్సై పరీక్షను ముందుగా ప్రకటించిన షెడ్యూల్ ప్రకారం నిర్వహించాలని అంతకుముందు విలేకరులతో మాట్లాడుతూ ఎమ్మెల్యే రఘునాథరెడ్డి డిమాండ్ చేశారు.

విద్యార్థుల జీవితాలతో ఆడుకోవద్దని ఆయన హెచ్చరించారు. విద్యార్థుల ప్రయోజనాల కోసం పదవిని వదులుకోవడానికి కూడా వెనుకాడనని ఆయన అన్నారు. తెలంగాణ రాష్ట్ర సమితి (తెరాస) కె. చంద్రశేఖర రావుపై ఆయన తీవ్ర వ్యాఖ్యలు చేశారు. కెసిఆర్ కుట్ర చేస్తున్నారని, కెసిఆర్ కుట్రలకు ప్రభుత్వం తలొగ్గుతుందని ఆయన అన్నారు.