2జి స్పెక్ట్రమ్ కుంభకోణంపై మౌనం వీడిన ప్రదాని మన్మోహన్

న్యూఢిల్లీ: 2జి స్పెక్ట్రమ్ కుంభకోణంపై ప్రధాని డాక్టర్ మన్మోహన్ సింగ్ మౌనం వీడారు. స్పెక్ట్రమ్ కుంభకోణంతో పాటు అన్ని వివాదాస్పద అంశాలపై తాము చర్చకు సిద్ధంగా ఉన్నామని ఆయన చెప్పారు. వివాదాస్పద అంశాలపై పార్లమెంటు సమావేశాలను అడ్డుకోవద్దని ఆయన రాజకీయ పార్టీలకు విజ్ఞప్తి చేశారు. హిందూస్థాన్ లీడర్ షిప్ సమ్మిట్ లో ఆయన శనివారం ప్రసంగించారు. మాజీ మంత్రి ఎ రాజా ఆధ్వర్యంలో జరిగిన 2జి స్పెక్ట్రమ్ కేటాయింపులపై వస్తున్న ఆరోపణలపై దర్యాప్తు సంస్థలు విచారిస్తున్నాయని ఆయన చెప్పారు.

పార్లమెంటు సమావేశాలు జరిగేలా చూడాలని, అన్ని వివాదాస్పద అంశాలపై చర్చించడానికి ప్రభుత్వం సిద్ధంగా ఉందని, ప్రభుత్వం ఏ అంశం గురించి భయపడడం లేదని ఆయన అన్నారు. 2జి స్పెక్ట్రమ్ స్కామ్ ఆరోపణలపై సంబంధిత సంస్థలు దర్యాప్తు చేస్తున్నాయని, ఇందులో తప్పు చేశారని భావించినవారిని ప్రభుత్వం వదిలి పెట్టదని, దీనిపై తాను కచ్చితమైన హామీ ఇవ్వగలనని ఆయన అన్నారు. తనకు ప్రతి రోజూ విద్యార్థి లాగే ఉందని, రోజూ పరీక్ష లాగే ఉంటుందని ఆయన అన్నారు.