బీహార్లో సిలిండర్ పేలి 7గురి మృతి, పలువురికి గాయాలు

పాట్నా: బీహార్లోని ఔరంగాబాద్‌ జిల్లాలోని దేవ్‌కేపచోకర్‌లో ఆదివారం సిలిండర్‌ బాంబు పేల్చడంతో ఏడుగురు ప్రాణాలు కోల్పోయారు. మరో 12 మంది తీవ్రంగా గాయపడ్డారు. మావోయిస్టులు దీన్ని పేల్చినట్టుగా తెలుస్తోంది. ఎన్నికలు ప్రశాంతంగా ముగిసాయని నితీష్ కుమార్ ప్రభుత్వయంత్రాంగం వూపిరి పీల్చుకుంటున్న సమయంలో బాంబు పేలుళ్లు ఆందోళన సృష్టించాయి. సిలిండర్‌ బాంబుపేలుడులో గాయపడిన వారిని ఆసుపత్రికి తరలించారు.

మావోయిస్టులు అమర్చిన సిలిండర్ బాంబును స్థానికులు చూసేందుకు ప్రయత్నించినపుడు అది అకస్మాత్తుగా పేలింది. ఈ బాంబును అధికారులు శనివారమే గుర్తించారు. తగిన పరికరాలు లేకవడంతో దాన్ని నిర్వీర్యం చేయకుండా వదిలేశారు. పోలీసు సూపరిండెండెంట్ వివేక్ రాజ్ సింగ్ మాట్లాడుతూ మావోయిస్టులు ప్లాన్ చేసి పెట్టారని, దీనిని నిన్ననే గుర్తించినప్పటికీ పరికరాలు లేక పోవటం వల్ల ఈ దుర్ఘటన జరిగిందంటున్నారు. తీవ్రంగా గాయపడ్డవారిలో 5గురి పరిస్థితి ఆందోళనగా ఉంది.