ఎస్ ఐ పరీక్షలు నిర్వహించాల్సిందే: ఏయులో మూడో రోజుకు దీక్షలు

విశాఖపట్నం: రాష్ట్ర ప్రభుత్వం ఎస్ఐ రాత పరీక్ష వాయిదాను నిరసిస్తూ ఆంధ్రా విశ్వవిద్యాలయంలో విద్యార్థుల ఐక్య కార్యాచరణ సమితి అధ్వర్యంలో చేస్తున్న ఆమరణ నిరాహార దీక్ష ఆదివారం మూడో రోజుకు చేరుకుంది. ప్రభుత్వం ముందుగా ప్రకటించిన షెడ్యూల్ ప్రకారం ఎస్సై పరీక్షను నిర్వహించాలని విద్యార్థులు డిమాండ్ చేస్తున్నారు.రాష్ట్ర ప్రభుత్వం దిగి వచ్చి మళ్లీ పరీక్షలు నిర్వహిస్తామని చెప్పే వరకు ఆందోళన విరమించేది లేదని వారు భీష్మిస్తున్నారు.

ప్రభుత్వం టీఆర్ఎస్ పార్టీ, ఆ పార్టీ విద్యార్థి సంఘాల డిమాండుకు తలొగ్గి వేలమంది అభ్యర్థుల భవిష్యత్తును నాశనం చేయవద్దన్నారు. తెలంగాణకు చెందిన హోంమంత్రి సబితారెడ్డి తెలంగాణకు అనుకూలంగా నిర్ణయాలు తీసుకుంటుందని ఆమె వెంటనే రాజీనామా చేయాలని డిమాండు చేశారు. ప్రభుత్వం మొదట నిర్ణయించినట్టు డిసెంబర్ 18, 19 తేదీల్లో పరీక్షలు నిర్వహిస్తామని హామీ ఇవ్వాలని, లేదంటే ఆందోళన ఉధృతం చేస్తామని హెచ్చరించారు. ఎస్సై రాత పరీక్షను వాయిదా వేయడాన్ని నిరసిస్తూ శుక్రవారం రాత్రి నుంచి విద్యార్థులు ఆందోళనకు దిగారు.