జగన్ను 24 గంటల్లో సస్పెండ్ చెయ్యాలి: సర్వే సత్యానారాయణ

హైదరాబాద్: కాంగ్రెసు పార్టీలో ఉండి పార్టీ ద్వారా కోట్లాది రూపాయలు సంపాదించుకొని ఇప్పుడు ఆ పార్టీనే తిట్టడం తల్లి పాలు తాగి రొమ్ము గుద్దడమే అని సిద్దిపేట పార్లమెంటు సభ్యుడు సర్వే సత్యనారాయణ కడప పార్లమెంటు జగన్మోహన్ రెడ్డిని విమర్శించారు. సొంత పార్టీ పెట్టుకోవాలని జగన్ బాగా ఉవ్వీళ్లూరుతున్నారన్నారు. ఆయనకు సొంతపార్టీ పెట్టుకోవాలని ఉంటే పెట్టుకోవచ్చని చెప్పారు. కాని సోనియాగాంధీపై దురుద్దేశ్య కథనాలు ప్రచురిస్తే మాత్రం కాంగ్రెసు కార్యకర్తలు చూస్తూ ఊరుకోరన్నారు.

సోనియా గాంధీపై వ్యతిరేక కథనాలు ప్రచురించిన సాక్షిపై వెంటనే కఠిన చర్యలు తీసుకోవాల్సిందిగా ఆయన పార్టీని కోరారు. జగన్ వెంటనే పార్టీనుండి వెళ్లిపోవాలన్నారు. లేదంటే పార్టీయే 24 గంటల్లో ఆయనను సస్పెండ్ చేయాలని డిమాండ్ చేశారు. అసలు వైయస్ రాజశేఖర్ రెడ్డి కుటుంబంపై ఆరోపణలు వచ్చినప్పుడే చర్యలు తీసుకోక పోవటం సోనియా అసమర్థత అని అన్నారు.