సాక్షిపై వ్యతిరేక ప్రసారాలపై వివేక్ ఇంట్లో తెలంగాణ ఎంపీలు భేటే

హైదరాబాద్‌: ఏఐసిసి అధ్యక్షురాలు సోనియా గాంధీ, ప్రధానమంత్రి మన్మోహన్‌సింగ్‌లపై సాక్షిలో వచ్చిన కథనాలపై ఆ సంస్థ యజమాని కడప పార్లమెంటు సభ్యుడు వైయస్ జగన్మోహన్ రెడ్డి వెంటనే వివరణ ఇవ్వాలని తెలంగాణకు చెందిన కాంగ్రెస్ పార్టీ పార్లమెంటు సభ్యులు డిమాండ్ చేశారు. సోనియా వంటి త్యాగశీలిపై విషపూరిత కథనాలు ప్రసారం చేయటంలో వారి దురుద్దేశ్యాలు కనిపిస్తున్నాయన్నారు. ఇలాంటి కథనాలు ప్రసారం చేస్తే ఊరుకునేది లేదని వారు హెచ్చరించారు.

కాగా సాక్షి వ్యతిరేక ప్రచారాలపై భవిష్యత్తులో తీసుకోవాల్సిన చర్యలకు పార్లమెంటు సభ్యుడు వివేక్‌ ఇంట్లో తెలంగాణకు చెందిన పార్లమెంటు సభ్యులు గుత్తా సుఖేందర్‌రెడ్డి, మంద జగన్నాథం, రాజగోపాల్‌రెడ్డిలతో పాటు పార్టీ నేతలు సమావేశమయ్యారు. సోనియా గాంధీ, మన్మోహన్‌ లపై విమర్శలను ఖండిస్తున్నట్లు వారు చెప్పారు. ఇలాంటి కథనాలు రాకుండా చూసుకోవాలని హెచ్చరించారు. అలాగే సాక్షిలో వచ్చిన తప్పుడు కథనాలపై ప్రెస్‌ కౌన్సిల్‌కు వెళ్తామని వారు స్పష్టం చేశారు.