అధిష్టానం పిలవలేదు, నేనే వెళుతున్నా: సిఎం రోశయ్య

అనంతపురం: అధిష్టానం నుండి తనకు పిలుపు రాలేదని ముఖ్యమంత్రి కొణిజేటి రోశయ్య సోమవారం పుట్టపర్తిలో విలేకరులతో మాట్లాడుతూ చెప్పారు. అధిష్టానం నుండి పిలుపు వచ్చిందునే ముఖ్యమంత్రి మంగళవారం ఢిల్లీ వెళుతన్నారన్న వార్తల్లో నిజం లేదని ఆయన కొట్టి పారేశారు. ఢిల్లీకి వస్తున్నట్టు నేనే అధిష్టానానికి సమాచారమందించానని చెప్పారు. ఢిల్లీ వెళ్లి రాష్ట్ర రాజకీయ పరిస్థితిపై సవివరణ ఇస్తానన్నారు. షెడ్యూల్ ప్రకారమే తాను ఢిల్లీ వెళ్తున్నట్లు ఆయన తెలిపారు.

తమ పార్టీ కడప పార్లమెంటు సభ్యుడు వైయస్ జగన్ వ్యవహారంపై ముఖ్యమంత్రి కె. రోశయ్య, పిసిసి అధ్యక్షుడు డి. శ్రీనివాస్ పంపిన నివేదికలు అందాయని, ఇది చాలా తీవ్రంగా పరిగణించాల్సిన విషయమని కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ అంతకు ముందు ఢిల్లీలో అన్నారు. ముఖ్యమంత్రి కె. రోశయ్యను తాము ఢిల్లీకి అహ్వానించలేదని ఆయన చెప్పారు. రోశయ్యనే ఢిల్లీకి వస్తున్నట్లు ఆయన తెలిపారు. తాజా పరిస్థితులను రోశయ్య అధిష్టానానికి వివరిస్తారని ఆయన చెప్పారు.