సాక్షి కాంగ్రెసు పత్రిక, స్వతంత్ర పత్రిక కాదు: ఎంపీ రాయపాటి

న్యూఢిల్లీ: కడప పార్లమెంటు సభ్యుడు వైయస్ జగన్మోహన్ రెడ్డికి సంబంధించిన సాక్షి పత్రిక, టీవీ కాంగ్రెసు పార్టీకి సంబంధించినవేనని గుంటూరు పార్లమెంటు సభ్యుడు రాయపాటి సాంబశివరావు సోమవారం అన్నారు. సాక్షి స్వతంత్ర్య పత్రిక కాదన్నారు. దివంగత ముఖ్యమంత్రి వైయస్ రాజశేఖరరెడ్డి సాక్షి పత్రికను అధిష్టానం అనుమతితోనే పెట్టాడని చెప్పారు. కాంగ్రెసు కు సంబంధించిన పత్రికలో ఏఐసిసి అధ్యక్షురాలు సోనియాగాంధీకి వ్యతిరేకంగా వార్తలు రావటంతో ఆయన ఆవేదన చెందారు.

సోనియాపై సాక్షి పత్రిక దురుద్దేశ్యంతోనే వ్యతిరేక కథనాలను ప్రచురిస్తుందన్నారు. సోనియాగాంధీకి వ్యతిరేకంగా కథనాలు రాసి ఆమె ప్రతిష్టను దెబ్బతీయాలని సాక్షి చూస్తే చూస్తూ ఊరుకోమన్నారు. వ్యతిరేక కథనాలు రాస్తే ఎవరిపైన అయినా దాడులు చేస్తామని ఆయన హెచ్చరించారు.

జగన్మోహన్ రెడ్డిని కాంగ్రెసు నుండి బయటకు వెళ్లగొట్టే ధైర్యం ఎవరికీ లేదని జమ్మలమడుగు శాసనసభ్యుడు ఆదినారాయణరెడ్డి అన్నారు. సాక్షిలో కథనం వచ్చిన విషయం కరక్టేనన్నారు. సాక్షిపై దాడులు చేయటం సరికాదని ఆయన చెప్పారు.