హైదరాబాదులో టెన్షన్ టెన్షన్: వెనక్కి తగ్గని ఉద్యోగ సంఘాలు

హైదరాబాద్: ప్రభుత్వ ఉద్యోగుల చలో హైదరాబాదును అడ్డుకోవడానికి ప్రభుత్వం పలు జిల్లాల్లోని ఉద్యోగ సంఘాల నేతలను సోమవారం అర్ధరాత్రి అరెస్టు చేశారు. వివిద జిల్లాలలనుండి హైదరాబాదుకు చేరుకునే ఉద్యోగులను పోలీసులు ఎక్కడికక్కడే అడ్డుకుంటున్నారు. హైదరాబాదులో నిషేదాజ్ఞలు విధించారు. ఉద్యోగులు బహిరంగసభ నిర్వహించుకోవడానికి పోలీసులు ఆమోదం తెలిపారు. అయితే ర్యాలీ నిర్వహించుకోవడానికి మాత్రం ఒప్పుకోలేదు. తమ డిమాండ్ల పరిష్కారాన్ని కోరుతూ ఉద్యోగ సంఘాలు మంగళవారం సోమవారం చలో హైదరాబాద్ కార్యక్రమాన్ని చేపట్టాయి.

ఖమ్మం జిల్లాలో 100 మందిని, గుంటూరు, రేపల్లే, మాచర్ల, అద్దంకి,నల్గొండలలో పోలీసులు ఉద్యోగ సంఘాల నాయకులను ఎక్కడికక్కడే అర్ధరాత్రి అరెస్టు చేశారు. వరంగల్లో రాత్రికి రాత్రి ఉద్యోగులను అరెస్టు చేసి పోలీసులు తీసుకు వెళ్లడానికి నిరసనగా కలెక్టరేట్ కార్యాలయాన్ని ముట్టడించారు. అరెస్టు చేసిన ఉద్యోగులను మండల కేంద్రాల్లోని పోలీసు స్టేషన్లకు తరలించినట్లు భావిస్తున్నారు. దీంతో హైదరాబాదులో అంతా టెన్షన్ టెన్షన్ గా ఉంది. ఉద్యోగులు సామూహిక సెలవుల్లో ఉన్నారు. కాగా కాంగ్రెస్ పార్టీ కార్యాలయం గాంధీ భవన్ వద్ద పోలీసులను భారీగానే మోహరించారు. ఎంతమంది పోలీసులను మోహరించిన తాము ర్యాలీ నిర్వహించి తీరుతామని ఉద్యోగసంఘాలు అంటున్నాయి.