సుధాకర్ బాబుకు బెదిరింపులు: వైయస్ జగన్ సాక్షి గొడవ

హైదరాబాద్: యూత్ కాంగ్రెసు అధ్యక్షుడు సుధాకర్ బాబును చంపుతానని తాను ఫోన్లో బెదిరించినట్లు ఓ ఛానల్లో వచ్చిన వార్తల్లో ఏ మాత్రం నిజం కాదని కాంగ్రెసు యువనేత చంద్రశేఖర్ రెడ్డి వైయస్ జగన్ కు చెందిన సాక్షి ఛానల్ కు ఫోన్ కాల్ చేసి చెప్పారు. మొదట తనకు ఆ నెంబరునుండి కడప పార్లమెంటు సభ్యుడు జగన్ కు వ్యతిరేకంగా ధర్నాలో రవీంధ్ర భారతి వద్ద పాల్గొనడానికి రావాల్సిందిగా సంక్షిప్త సమాచారం(ఎస్సెమ్మెస్) వచ్చిందన్నారు. ఆ నెంబరు ఎవరిదో, ఎక్కడినుండి వచ్చిందో తనకు తెలియదన్నారు.

అయితే జగన్ కు వ్యతిరేకంగా మెసేజ్ చూసి ఆ నెంబరుకు ఫోన్ చేసి వైయస్ కుటుంబం లేకుంటే కాంగ్రెసు పార్టీ లేదని, జగన్ కు వ్యతిరేకంగా ధర్నాలు, రాస్తారోకోలు ఎందుకని మాత్రమే ప్రశ్నించానన్నారు. దానికే ఓ ఛానల్ సుధాకర్ బాబును చంపుతానని బెదిరించినట్లు వార్తలు ప్రసారం చేయటం దురదృష్టకరమన్నారు. రాష్ట్రంలో జగన్ కు వ్యతిరేకంగా ఇంత రాద్దాంతం ఎందుకు జరుగుతుందో తనకు అర్థం కావటం లేదని ఆయన పోన్లో చెప్పారు. తన వద్ద మెసేజ్ ఇప్పటికీ ఉందని ఆయన చెప్పారు.