చిరంజీవి డిప్యూటీ సిఎం, మంత్రివర్గంలోకి ప్రజారాజ్యం?

న్యూఢిల్లీ: ప్రజారాజ్యం వ్యవస్థాపక అధ్యక్షుడు చిరంజీవిని ఉప ముఖ్యమంత్రి పదవి వరించబోతుందా? మంగళవారం న్యూఢిల్లీ జరుగుతున్న పరిణామాలు దానిని బలపరుస్తున్నట్టుగా కనిపిస్తుంది. పుట్టపర్తిలో ఉన్న ముఖ్యమంత్రి హుటాహుటిన ఢిల్లీ వెళ్లటం, అదే రోజు చిరంజీవి పోలవరంపై మాట్లాడడానికి ప్రధానమంత్రి మన్మోహన్ సింగ్ ను కలవడానికి ఢిల్లీకి వెళ్లడం అందరిలోనూ ఉత్కంఠకు దారి తీసింది. ముఖ్యమంత్రి రోశయ్య సోనియాగాంధీని కలవడానికి మీడియా కన్నుగప్పి రహస్యంగా వెళ్లినట్లు సమాచారం. ఓ సీనియర్ అధికారికి సంబంధించిన కారులో రోశయ్య రహస్యంగా 10 జనపథ్ చేరుకున్నారు. అప్పటికే అక్కడ ఉన్న రాష్ట్ర కాంగ్రెసు వ్యవహారాల ఇంఛార్జ్ వీరప్ప మొయిలీతో కలిసి సోనియా గాంధీతో చర్చించినట్లు సమాచారం.

వైఎస్ జగన్ ను పక్కన పెట్టడానికి మంత్రివర్గ విస్తరణకు అనుమతించాల్సిందిగా కోరి, పార్టీకి ఏదైనా సమస్య ఏర్పడితేచిరంజీవి స్నేహహస్తం అందిస్తాడని చెప్పినట్లు సమాచారం. వీరప్ప మొయిలీ ఎదుటే చిరంజీవి పార్టీకి ఏమాత్రం విశ్వాసంగా ఉంటారో చర్చించారు. అయితే చిరు ప్రభుత్వానికి సపోర్టు చేయాలంటే మూడు ముఖ్యమైన పోర్టు పోలియోలు ఇవ్వాల్సింది ఉందన్నాడు. అలాగే చిరంజీవిని ఉప ముఖ్యమంత్రిగా చేయాల్సి ఉందని చెప్పారు. చిరంజీవి విషయమై సోనియా అంత సావధానంగా విన్నట్లు వినికిడి.