మళ్లీ నితీష్ సారథ్యంలోని ఎన్డీఏకే పట్టం గట్టిన బీహార్ ప్రజలు

పాట్నా: బీహార్ ఎన్నికలలో మళ్లీ ఎన్డీఏ హవా కొనసాగుతోంది. బీహార్ ముఖ్యమంత్రి నితీష్ కుమార్ కే బీహార్ ప్రజలు మళ్లీ పట్టం గడుతున్నారు. జనతాదళ్(యు) - 100, భారతీయ జనతా పార్టీ 67 సీట్లు కలిసి ఎన్డీఏ 167 సీట్లలో ఆధిక్యతలో కొనసాగుతోంది. లాలూ ప్రసాద్ యాదవ్ - రాంవిలాశ్ పాశ్వాన్ ఆధ్వర్యంలోని ఆర్జేడి, ఎల్జేపి కూటమికి గట్టి దెబ్బ తగిలింది. వారికి ఇప్పటి వరకు 49 సీట్లలో మాత్రమే ఆధిక్యత ఉంది. ఇక కాంగ్రెస్ 9 సీట్లు మాత్రమే ఆధిక్యతలో కొనసాగుతూ సింగిల్ డిజిట్ కే పరిమితమయ్యే పరిస్థితి ఉంది. ఇతరులు 12 సీట్లలో ఆధిక్యతలో కొనసాగుతున్నారు.

మొత్తం 243 శాసనసభ స్థానాలకు ఎన్నికలు జరిగాయి. 42 ఓట్ల లెక్కింపు కేంద్రాలను ఏర్పాటు చేశారు. అక్కడ గట్టి పోలీసు భద్రత ఏర్పాటు చేశారు. బీహార్ లో కాంగ్రెసు యువ నేత రాహుల్ మంత్రం పనిచేయలేదు. కాంగ్రెస్ పార్టీ నాయకులు పెట్టుకున్న ఆశలు వమ్మయ్యాయి. రెండో సారి బీహార్ ముఖ్యమంత్రి పీఠం అధిష్టించడానికి నితీష్ కుమార్ కు ఏ మాత్రం ఆటంకాలు ఉండే పరిస్థితి లేదు. సర్వే ఫలితాలకు అనుగుణంగా బీహార్ శాసనసభ ఎన్నికల ఫలితాలు వెలువడుతున్నాయి.