కిరణ్ కుమార్ రెడ్డికి సిఎం వద్దంటున్న ఆంధ్రా ఎంపీలు

న్యూఢిల్లీ: రోశయ్య ముఖ్యమంత్రిగా రాజీనామా చేయటంతో కాంగ్రెసు అధిష్టానం కేంద్రమంత్రి జైపాల్ రెడ్డి, శాసనసభాపతి కిరణ్ కుమార్ రెడ్డి, పర్యాటక, సమాచారశాఖ మంత్రి గీతారెడ్డి, మాజీ మంత్రి జానారెడ్డి పేర్లు బయటకి వచ్చాయి. అయితే జైపాల్ రెడ్డి స్వయంగా ముఖ్యమంత్రి పదవి వద్దన్నట్టు సమాచారం వచ్చింది. దీంతో అధిష్టానం కిరణ్ కుమార్ ను ముఖ్యమంత్రి పీఠంపై కూర్చుండబెట్టడానికి సమాయత్తమయినట్టు సమాచారం. అయితే అధిష్టానం వైఖరిని సీమాంధ్ర పార్లమెంటు సభ్యులు ఆమోదించడానికి సిద్ధంగా లేరు. కిరణ్ కుమార్ రెడ్డి అభ్యర్థిత్వాన్ని వారు వ్యతిరేకిస్తున్నారు.

అయితే వారు వ్యతిరేకించడానికి కారణం తెలంగాణ అంశమనేది అంతర్గత సమాచారం. సీమాంధ్ర నుండి ఎవరైనా ముఖ్యమంత్రి అయితే శ్రీకృష్ణ కమిటీ నివేదిక తర్వాత ప్రభుత్వానికి ఉద్యమాన్ని కట్టడి చేయటం కష్టమవుతుందని వారి అభిప్రాయం. తెలంగాణనుండి ముఖ్యమంత్రిగా చేస్తే తెలంగాణ వారికి తెలంగాణ ముఖ్యమంత్రి ఉన్నాడన్న అభిప్రాయం ఏర్పడటంతో పాటు తెలంగాణ వారే ఉద్యమాన్ని అడ్డుకోగలరని వారి ఉద్దేశ్యంగా కనబడుతుంది.