కిరణ్ కుమార్ ఇంటి వద్ద సందడి: గల్లా అరుణకుమారి భేటీ

హైదరాబాద్: పలు కారణాల వల్ల ముఖ్యమంత్రి పదవిని జైపాల్ రెడ్డి వద్దంటుండటంతో ఆయన తర్వాత ఉన్న రేసులో ఉన్న రాయలసీమకు చెందిన శాసనసభాపతి కిరణ్ కుమార్ రెడ్డి పేరు అధిష్టానం పరీశీలిస్తుంది. రాయలసీమలో కడప పార్లమెంటు సభ్యుడు వైఎస్ జగన్మోహన్ రెడ్డిని అడ్డుకోవాలంటే కిరణ్ కుమార్ రెడ్డిని తెరపైకి తీసుకు రావాలని కూడా యోచిస్తుంది. మొదట జైపాల్ రెడ్డి, కిరణ్ కుమార్ రెడ్డి, గీతారెడ్డి, జానారెడ్డిల పేర్లపై అధిష్టానం ఆలోచించింది. అయితే తెలంగాణ ఉద్యమం దృష్ట్యా జైపాల్ రెడ్డి వెనక్కి వెళ్లాడు. ఈ స్థితిలో కిరణ్ కుమార్ రెడ్డి ముఖ్యమంత్రి అవుతారనే ప్రచారానికి ప్రాధాన్యం చేకూరింది. కాంగ్రెసు నాయకులు కూడా కిరణ్ కుమార్ రెడ్డిని కలుస్తున్నారు.

కిరణ్ కుమార్ రెడ్డి సైతం అప్పుడప్పుడు ఢిల్లీ వెళ్లి సోనియాను కలుసినట్లు వార్తలు వస్తున్నాయి. కిరణ్ కుమార్ ను కలిసిన అనంతరం గల్లా మీడియాతో మాట్లాడారు. స్పీకర్ మా జిల్లా వారు కాబట్టి రోశయ్య రాజీనామా అనంతరం ఏం చేద్దామనే విషయాన్ని చర్చించడానికి మాత్రమే వచ్చినట్లు ఆమె చెబుతున్నారు. కాగా కిరణ్ కుమార్ రెడ్డి, జైపాల్ రెడ్డి ఇళ్ల వద్ద పోలీసులు భారీగా మోహరించారు. వారి పేర్లు ముఖ్యమంత్రి అభ్యర్థిగా వినిపిస్తున్న నేపథ్యంలో వారి ఇళ్ల వద్ద గట్టి బందోబస్తును అధికారులు మోహరించారు.