సిఎల్పీ సమావేశానికి జగన్ తల్లి వైయస్ విజయమ్మ వస్తారా?

హైదరాబాద్: హైదరాబాదులో బుధవారం సాయంత్రం ఏర్పాటైన కాంగ్రెసు లెజిస్లేచర్ పార్టీ (సిఎల్పీ) సమావేశానికి దివంగత నేత వైయస్ రాజశేఖర రెడ్డి సతీమణి వైయస్ విజయమ్మ వస్తారా అనేది ఆసక్తికరంగా మారింది. తన కుమారుడు వైయస్ జగన్ పై చర్చకే సమావేశం జరుగుతున్నట్లు ప్రచారం జరుగుతుండడంతో ఆమె ఏ విధమైన నిర్ణయం తీసుకుంటారనే విషయంపై ఊహాగానాలు చెలరేగుతున్నాయి. వైయస్ స్థానంలో పులివెందుల నియోజకవర్గం నుంచి వైయస్ విజయమ్మ శాసనసభకు ఎన్నికయ్యారు.

బెంగళూరులో ఉన్న వైయస్ జగన్ సిఎల్పీ సమావేశానికి వచ్చే అవకాశాలు లేవని తెలుస్తున్నప్పటికీ తన తల్లిని పంపుతారా అనేది కూడా చర్చనీయాంశంగానే మారింది. వైయస్ జగన్ బెంగళూర్ లోనే తన వ్యూహరచనకు పదును పెడుతున్నట్లు చెబుతున్నారు. కాంగ్రెసు నాయకత్వంపై సాధ్యమైనంత ఎక్కువ మందిని తిరుగుబాటు సమాయత్తం చేయాలనేది ఆయన వ్యూహంగా కనిపిస్తోంది.