పని ఒత్తిడి వల్లే రాజీనామా, రాజకీయ ఒత్తిళ్లు లేవు: రోశయ్య

హైదరాబాద్: వయస్సు వల్ల పని ఒత్తిడి తట్టుకోలేక రాజీనామా చేస్తున్నట్లు, తన రాజీనామా వెనక రాజకీయ ఒత్తిళ్లు లేవని ముఖ్యమంత్రిగా రాజీనామా చేయడానిని నిర్ణయించుకున్న రోశయ్య చెప్పారు. సోనియా ఆదేశాల మేరకు పదవి చేపట్టానని ఆయన మీడీయా సమావేశంలో బుధవారం మధ్యాహ్నం చెప్పారు. గత పద్నాలుగు నెలల్లో వచ్చిన సమస్యలన్నింటికి అధిష్టానం, మంత్రులు, రాష్ట్ర కాంగ్రెస్ కార్యవర్గం తోడ్పాడుతో నిరంతరం శ్రమిస్తూ వచ్చానని అన్నారు. పార్లమెంటు సభ్యులు, శాసనమండలి, శాసనసభ్యులు కూడా తనకు మంచి సహకారం అందించారన్నారు. ప్రభుత్వయంత్రాంగం అంతా తనకు తోడ్పాటును అందించారన్నారు. కాగా మీడియా సమావేశం అనంతరం ముఖ్యమంత్రి గవర్నర్ కు రాజీనామా సమర్పించడానికి రాజ్ భవనానికి బయలుదేరారు.

తన తర్వాత ముఖ్యమంత్రి ఎవరైనా తన సహకారం పూర్తిగా ఉంటుందన్నారు. పనిభారంతో కొన్నిసార్లు అసహనానికి లోనయ్యానని చెప్పారు. అయితే ఎందుకు రాజీనామా చేస్తున్నానో పూర్తిగా త్వరలో వివరిస్తానని చెప్పారు. నా వయస్సును పనికి సహకరించలేక పోతుందన్నారు. ముఖ్యమంత్రిగా అన్ని శాఖల సమన్వయం సమస్యగా ఉంటుందన్నారు. అయితే తానేమీ కాంగ్రెస్ పార్టీని విడిచిపెట్టనన్నారు. ఏ బాధ్యతనైనా సమర్థవంతంగా నిర్వహించాన్నారు. రాజీనామాలో ఎలాంటి రాజకీయ ఒత్తిళ్లు లేవన్నారు. నాకు గ్రూపు రాజకీయాలు లేవన్నారు.