సిఎల్పీలో ఎదురుదాడికి వైయస్ జగన్ క్యాంప్ రెడీ

హైదరాబాద్: కాంగ్రెసు లెజిస్లేచర్ పార్టీ (సిఎల్పీ) సమావేశంలో వైయస్ జగన్ వర్గం ఎదురుదాడికి రంగం సిద్ధం చేసుకుంటున్నట్లు సమాచారం. వైయస్ జగన్ వ్యవహార శైలిపై సమావేశంలో చర్చ జరిగితే అడ్డుకోవాలనే ఎత్తుగడతో వైయస్ జగన్ వర్గానికి చెందిన శానసభ్యులు ఉన్నట్లు తెలుస్తోంది. శ్రీకాంత్ రెడ్డి, ఆదినారాయణ రెడ్డి కరుడు గట్టిన వైయస్ జగన్ వర్గీయులు సమావేశంలో ఎదురుదాడికి దిగేందుకు సిద్ధమైనట్లు చెబుతున్నారు. అయితే, ఇంకా దీనిపై వైయస్ జగన్ వర్గం తుది నిర్ణయం తీసుకోలేదని తెలుస్తోంది. దివంగత నేత వైయస్ రాజశేఖర రెడ్డి వైయస్ విజయమ్మ హాజరవుతారా, లేదా అనేది కూడా ఇంకా తెలియడం లేదు.

విజయమ్మ కూడా హాజరై అవసరమైతే రాజీనామా చేయాలనే ప్రతిపాదన కూడా జగన్ వర్గం నుంచి వస్తున్నట్లు చెబుతున్నారు. గత రెండు మూడు రోజులుగా తన కుమారుడు వైయస్ జగన్ కు వ్యతిరేకంగా జరుగుతున్న పరిణామాల పట్ల ఆమె మనస్తాపానికి గురైనట్లు చెబుతున్నారు. అయితే, ఎదురు దాడి తప్పదని జగన్ వర్గానికి చెందిన కాంగ్రెసు నాయకుడు గోనె ప్రకాశరావు మాటలను బట్టి అర్థమవుతోంది. వైయస్ జగన్ పై చర్చ జరిపేంత సాహసం సమావేశంలో చేయరని, చర్చ ప్రారంభమైతే ఎలా ఉంటుందనేది అందరికీ తెలుసునని ఆయన అన్నారు. దీన్నిబట్టి సిఎల్పీ సమావేశం రసాభాసగా మారే అవకాశం కూడా లేకపోలేదు.