మారిన వైయస్ జగన్ నిర్ణయం: హైదరాబాదుకు పయనం

బెంగళూరు: ముఖ్యమంత్రిగా కె. రోశయ్య రాజీనామా చేసిన నేపథ్యంలో కాంగ్రెసు కడప పార్లమెంటు సభ్యుడు వైయస్ జగన్ వ్యూహం మారినట్లు కనిపిస్తోంది. ఆయన తన నిర్ణయాన్ని కూడా మార్చుకున్నారు. బుధవారం సాయంత్రం జరిగే సిఎల్సీ సమావేశానికి హాజరు కాకూడదని నిర్ణయించుకున్నారు. తన వ్యవహార శైలిపైనే ప్రధానంగా సిఎల్పీ సమావేశంలో చర్చ జరుగుతుందనే వార్తలు వస్తుండడంతో ఆయన సిఎల్పీ సమావేశానికి రాకూడదని తొలుత నిర్ణయించుకున్నారు. అయితే, రోశయ్య రాజీనామా చేయడంతో ఆయన మనసు మార్చుకున్నారు. బెంగళూర్ నుంచి హైదరాబాద్ బయలుదేరారు.

తాజా పరిణామాల నేపథ్యంలో వైయస్ జగన్ వర్గం తన వ్యూహాన్ని మార్చుకునే అవకాశం ఉంది. పార్టీ అధిష్టానం నుంచి వచ్చిన పేరును ముఖ్యమంత్రి పదవికి వైయస్ జగన్ వర్గం ఆమోదిస్తుందా, లేదా అనేది చూడాల్సి ఉంది. వైయస్ జగన్ తల్లి, పులివెందుల శాసనసభ్యురాలు వైయస్ విజయమ్మ కూడా సమావేశానికి వచ్చే అవకాశం ఉంది. కొత్త సిఎల్పీ నేత ఎన్నిక బాధ్యతను సోనియాకు అప్పగిస్తూ తీర్మానం చేయాలనే అధిష్టానం పరిశీలకుల ఎత్తుగడలను వైయస్ జగన్ ఎలా తీసుకుంటారనేది కూడా ఆసక్తిగా మారింది.