దేశంలో ఇటలీ పాలన: జగన్ వర్గం చెవిరెడ్డి సంచలన వ్యాఖ్యలు

తిరుపతి: ఆంగ్లేయుల పాలన పోయి మన దేశంలో ఇటలీ పాలన వచ్చిందని కడప పార్లమెంటు సభ్యుడు వైఎస్ జగన్మోహన్ రెడ్డి వర్గం కాంగ్రెస్ నాయకుడు, తుడా మాజీ చైర్మన్ చెవిరెడ్డి భాస్కరరెడ్డి శుక్రవారం అధిష్టానంపై ధ్వజమెత్తారు. కాంగ్రెస్ అధిష్టానం నియంతలా వ్యవహరిస్తోందని అన్నాడు. అధిష్టానం సిఎల్పీ నాయకున్ని సీల్డు కవర్ ద్వారా ఎన్నుకుంటుందని, ఇలా ఎన్నుకోవటం మంచి సంస్కృతి కాదని ఆయన అన్నారు.

సీల్టు కవర్ సంస్కృతి ద్వారా కాంగ్రెస్ ప్రజాస్వామ్యాన్ని ఖూనీ చేసిందనన్నారు. అన్ని వర్గాల ప్రజలకు ఆమోదయోగ్యమైన వ్యక్తిని ముఖ్యమంత్రిగా చేయాలని డిమాండ్ చేశారు. కాగా చెవిరెడ్డి భాస్కరరెడ్డి తిరుపతిలోని పాలమాకులలో పాదయాత్ర నిర్వహించారు. అయితే దానిని తాజా మాజీ మంత్రి గల్లా అరుణకుమారి వర్గీయులు అడ్డుకున్నారు. దాంతో అక్కడ పరిస్థితి ఉద్రిక్తంగా మారింది.