నితీష్ కుమార్ ప్రమాణ స్వీకారానికి అద్వానీ, సుష్మాస్వరాజ్

పాట్నా: అభివృద్ధే మంత్రంగా బీహారీల మనసులను కొల్లగొట్టి నయీ కహానీ లిఖించిన నితీష్‌కుమార్‌ సారథ్యంలోని ఎన్డీఏ ప్రభుత్వం రెండోసారి ప్రమాణ స్వీకారం చేయనుంది. శుక్రవారం జెడి(యు) శాసనసభాపక్షనేత నితీష్ కుమార్ ముఖ్యమంత్రిగా ప్రమాణ స్వీకారం చేయనున్నారు. భాజపా, జేడీయూ కూటమి శాసనసభా పక్ష నేతగా ఎన్నికైన నితీష్‌ నేతృత్వంలోని కొత్త ప్రభుత్వం ఈ మధ్యాహ్నం రెండున్నర గంటలకు గాంధీ మైదాన్‌లో జరిగే కార్యక్రమంలో ప్రమాణ స్వీకారం చేయనుంది. 243 సీట్లలో నితీష్ అభివృద్ధి మంత్రంతో 206 సీట్లు గెలుచుకొని అటు ఆర్జేడి - ఎల్జేపిని, కాంగ్రెస్ ని కోలుకోలేని దెబ్బతీసిన విషయం తెలిసిందే.

బీహార్ గవర్నర్‌ దేవానంద్‌ కోన్వర్‌ నితీష్ తో ప్రమాణ స్వీకారం చేయిస్తారు. కాగా భాజపా నేత సుశీల్‌ కుమార్‌ మోడీ ఉప ముఖ్యమంత్రిగా మళ్లీ ఎన్నికయ్యే అవకాశం ఉంది. నితీష్ కుమార్ ముఖ్యమంత్రిగా ప్రమాణం చేస్తున్న ఈ కార్యక్రమానికి భారతీయ జనతా పార్టీ జాతీయ అధ్యక్షుడు నితిన్‌ గడ్కరీ, సీనియర్ నేత ఎల్‌కే అద్వానీ, పార్లమెంటరీ నేత సుష్మాస్వరాజ్‌ హాజరవుతున్నారు.