సిఎం కిరణ్ కుమార్ తో తెలంగాణకు నష్టం లేదు: ఉప్పునూతల

హైదరాబాద్‌: మూడు నెలల క్రితమే ముఖ్యమంత్రిగా కిరణ్ కుమార్ రెడ్డి పేరు ఖరారయ్యిందని కాంగ్రెస్ సీనియర్ నాయకుడు ఉప్పునూతల పురుషోత్తంరెడ్డి శుక్రవారం విలేకరులతో అన్నారు. ఆయన ముఖ్యమంత్రిగా బాధ్యతలు చేపట్టిన కిరణ్ కుమార్ రెడ్డిని కలిసి అభినందనలు తెలిపారు. ఇప్పుడు రాష్ట్రంలో ఉన్న పరిస్థితుల దృష్ట్యా కొత్త నాయకత్వం అవసరమని అధిష్యానం అప్పుడే ఆలోచించిందని, అందుకే ఆయన నాయకత్వాన్ని ముందుకు తీసుకు వచ్చిందని భావిస్తున్నట్లు చెప్పారు. కిరణ్ కుమార్ రెడ్డి అన్ని కోణాల్లో సమర్థుడన్నారు. ఆయన యువకుడు కాబట్టి అన్నింటిని గట్టిగా ఎదుర్కొనగలడని అన్నారు.

కాగా తెలంగాణకు కిరణ్ కుమార్ రెడ్డి వల్ల ఎలాంటి నష్టం లేదన్నారు. ఉప ముఖ్యమంత్రి పదవి ఆరో వేలు లాంటిదని దానివల్ల పెద్దగా ఉపయోగం ఏమీ ఉండదన్నారు. ఉప ముఖ్యమంత్రి తీసుకున్నా తీసుకోకపోయినా తెలంగాణకు ప్రత్యేకంగా ఒరిగేదేమీ ఉండదన్నారు. కిరణ్ కుమార్ రెడ్డి ఎంపిక అనేక అర్థాలున్నాయన్నారు.ఆయనతో తెలంగాణ విషయంలో ఎలాంటి నష్టం లేదని ఉప్పునూతలఅన్నారు. అంతా కలసివుంటేనే తెలంగాణ సాధ్యమన్నారు.