జైపాల్ రెడ్డిపై విరుచుకుపడిన జగన్ వర్గీయుడు గోనె ప్రకాశరావు

హైదరాబాద్: తమ నేతపై తీవ్ర వ్యాఖ్యలు చేసిన ఎస్ జైపాల్ రెడ్డిపై కాంగ్రెసు కడప పార్లమెంటు సభ్యుడు వైయస్ జగన్ వర్గానికి చెందిన నాయకుడు గోనె ప్రకాశ రావు తీవ్రంగా మండిపడ్డారు. జైపాల్ రెడ్డిపై ఆయన విరుచుకుపడ్డారు. జైపాల్ రెడ్డిని ఐరన్ లెగ్ గా ఆయన శనివారం మీడియా ప్రతినిధుల సమావేశంలో అభివర్ణించారు. జైపాల్ రెడ్డిని ప్రజాదరణ లేని నాయకుడని ఆయన కొట్టిపారేశారు. పార్టీని, వైయస్ జగన్ ను భ్రష్టు పట్టించడానికి కేంద్ర మంత్రులు పురంధేశ్వరి, జైపాల్ రెడ్డి ప్రయత్నిస్తున్నారని ఆయన విమర్శించారు.

వైయస్ జగన్ పార్టీ అధిష్టానానికి వ్యతిరేకంగా మాట్లాడలేదని ఆయన స్పష్టం చేశారు. జైపాల్ రెడ్డి గతంలో ఇందిరా గాంధీపై విమర్శలు చేశారని ఆయన చెప్పారు. బోఫోర్స్ వ్యవహారంలో రాజీవ్ గాంధీని ఉరి తీయాలని కూడా ఆయన అన్నట్లు ప్రకాశ రావు గుర్తు చేశారు. జైపాల్ రెడ్డిని చరిత్ర హీనుడిగా ఆయన అభివర్ణించారు. పార్టీ అధిష్టానానికి, వైయస్ జగన్ కు మధ్య అంతరం పెంచడానికి ప్రయత్నిస్తున్నారని జగన్ వర్గానికి చెందిన ఎమ్మెల్సీ పుల్లా పద్మావతి అన్నారు.