తెర మీదికి సూరీడు: వైయస్ జగన్ ను కార్నర్ చేసేందుకు కిరణ్ ప్లాన్

హైదరాబాద్: దివంగత నేత వైయస్ రాజశేఖర రెడ్డి మరణం తర్వాత తెరమరుగైన సూరీడ్ మళ్లీ తెర మీదికి వచ్చారు. వైయస్సార్ కు సూరీడుకు మధ్య గల సాన్నిహిత్యం లోకానికంతా తెలుసు. కిరణ్ కుమార్ రెడ్డి ముఖ్యమంత్రి కాగానే ఆయన తిరిగి వెలుగులోకి వచ్చారు. గులాం నబీ ఆజాద్, ప్రణబ్ ముఖర్జీ, వీరప్ప మొయిలీ, తదితర నేతలతో సన్నిహితంగా తిరుగుతూ ఆయన కనిపించారు. వైయస్సార్ మరణం తర్వాత కడప పార్లమెంటు సభ్యుడు వైయస్ జగన్ తో సూరీడి సంబంధాలు దెబ్బ తిన్నట్లు చెబుతున్నారు.

కిరణ్ కుమార్ రెడ్డి ప్రత్యేకంగా సూరీడిని పిలిపించినట్లు చెబుతున్నారు. వైయస్ జగన్ ను దెబ్బ తీయడానికి కిరణ్ కుమార్ రెడ్డి వేసిన మాస్టర్ ప్లాన్ లో భాగంగానే సూరీడిని కిరణ్ కుమార్ రెడ్డి తెర మీదికి తెచ్చినట్లు భావిస్తున్నారు. వైయస్సార్, వైయస్ జగన్ ల రహస్యాలన్నీ సూరీడికి తెలుసు. వాటిని సూరీడి నుంచి రాబట్టేందుకు కిరణ్ కుమార్ ఆ ప్లాన్ వేసినట్లు చెబుతున్నారు. వైయస్ జగన్ కు సంబంధించిన విషయాలు తెలిస్తే ఆయనను కార్నర్ చేయడం సులభమవుతుందనేది కిరణ్ కుమార్ ఉద్దేశ్యంగా చెబుతున్నారు.