వైయస్ జగన్ రాజీనామా చేయాల్సింది కాదు: డి శ్రీనివాస్

హైదరాబాద్: పార్లమెంటు సభ్యత్వానికి దివంగత ముఖ్యమంత్రి వైయస్ రాజశేఖరరెడ్డి తనయుడు వైయస్ జగన్ రాజీనామా చేయటం దురదృష్టకరమని ప్రదేశ్ కాంగ్రెసు కమిటీ అధ్యక్షుడు డి శ్రీనివాస్ సోమవారం అన్నారు. వైయస్ జగన్ రాజీనామా చేయాల్సింది కాదని ఆయన అన్నారు. వైయస్ కు, జగన్ కు పార్టీ ప్రాధాన్యత ఇచ్చిందన్నారు. వైయస్ రాజశేఖరరెడ్డి కాంగ్రెసు పార్టీకి ఎంతో సేవ చేశారన్నారు. ఆయన చనిపోవడమే కాంగ్రెసు పార్టీకి పెద్ద నష్టమని అన్నారు. వైయస్ రాజశేఖరరెడ్డి అధిష్టానానికి అనుకూలంగా ఉండే వారన్నారు.

జగన్ పై పార్టీ ఎలాంటి చర్యలు తీసుకోలేదన్నారు. మీడియా ద్వారానే తాను జగన్ రాజీనామాను తెలుసుకున్నానన్నారు. జగన్ ఇలాంటి సమయంలో రాజీనామా చేయాల్సింది కాదన్నారు. ఆయన సంయమనంతో ఉండి ఉంటే చర్చలతో అన్నీ సర్దుబాటయ్యేవన్నారు. వైయస్ ఆర్, నేను కలిసి కట్టుగా కాంగ్రెసు పార్టీ అభివృద్ధి కోసం కష్టపడ్డామన్నారు. అధిష్టానం ఆశీస్సులు కూడా వైయస్ కు, నాకు ఉండేవన్నారు.

ఇద్దరం కలిసి పార్టీని రెండుసార్లు అధికారంలోకి తీసుకు రావడానికి మా పాత్ర మేం పోషించామన్నారు. హైకమాండ్ వైయస్ ను చాలా ప్రోత్సహించిందన్నారు. వైయస్ వెంటే ఉన్న నాకు వైయస్ ను సోనియా ఎలా ప్రోత్సహించిందో తెలుసునన్నారు. జగన్ ఏ కారణాల వల్ల రాజీనామా చేశారో నాకు తెలియదన్నారు. తన లేఖ నాకు ఇంకా అందలేదని, అది అందిన తర్వాత స్పందిస్తానని చెప్పారు.