వైయస్ విజయమ్మ రాజీనామాపై నిర్ణయం పెండింగ్

హైదరాబాద్: శాసనసభ సభ్యత్వానికి పులివెందుల శాసనసభ్యురాలు వైయస్ విజయలక్ష్మి చేసిన రాజీనామాను ఇప్పుడిప్పుడే ఆమోదించే అవకాశాలు లేవని తెలుస్తోంది. ఆమె రాజీనామా లేఖ శాసనసభ ఉప సభాపతి నాదెండ్ల మనోహర్ కు అందింది. స్పీకర్ గా ఉన్న కిరణ్ కుమార్ రెడ్డి రాజీనామా చేసి ముఖ్యమంత్రి పదవి చేపట్టడంతో ఆమె రాజీనామా లేఖ డిప్యూటీ స్పీకర్ నాదెండ్ల మనోహర్ కు అందింది. సంప్రదాయాలను పాటించి విజయమ్మ రాజీనామాపై నిర్ణయం తీసుకుంటానని నాదెండ్ల మనోహర్ చెప్పారు.

వైయస్ జగన్ రాజీనామాపై స్పందించినంత త్వరగా వైయస్ విజయమ్మ రాజీనామాపై స్పందించేందుకు కాంగ్రెసు పార్టీ అధిష్టానం సిద్ధంగా లేదు. బుధవారం కిరణ్ కుమార్ రెడ్డి మంత్రివర్గం ప్రమాణ స్వీకారం చేస్తున్న నేపథ్యంలో కూడా ఆమె రాజీనామాపై నిర్ణయాన్ని పెండింగులో పెట్టే అవకాశాలున్నట్లు తెలుస్తోంది.