వైయస్ జగన్ రాజీనామా: అదే దారిలో వైయస్ విజయలక్ష్మి?

హైదరాబాద్: లోకసభ సభ్యత్వానికి వైయస్ జగన్ రాజీనామా చేసినట్లు ప్రచారం జరుగుతోంది. కాంగ్రెసు పార్టీ అధిష్టానం చర్యలపై తీవ్ర ఆగ్రహం వ్యక్తం చేస్తూ వైయస్ జగన్ రాజీనామా చేసినట్లు చెబుతున్నారు. తన బాబాయ్ వైయస్ వివేకానంద రెడ్డిని మంత్రివర్గంలోకి తీసుకుని వైయస్సార్ కుటుంబాన్ని చీల్చడానికి అధిష్టానం పూనుకుందని అభిప్రాయపడిన ఆయన రాజీనామాస్త్రం ప్రయోగించినట్లు తెలుస్తోంది. కాంగ్రెసు పార్టీకి కూడా ఆయన రాజీనామా చేయాలని అనుకున్నట్లు తెలుస్తోంది. తాను రాజీనామా చేసే విషయంపైనే ఆయన తన సన్నిహిత శాసనభ్యులతో, పార్టీ నాయకులతో చర్చలు జరిపినట్లు తెలుస్తోంది.

కాగా, వైయస్ విజయలక్ష్మి కూడా శాసనసభా సభ్యత్వానికి రాజీనామా చేయనున్నట్లు ప్రచారం జరుగుతోంది. రాజీనామా చేయడానికే ఆమె హైదరాబాదు వచ్చినట్లు భావిస్తున్నారు. తాను రాజీనామా చేయడానికి దారి తీసిన పరిస్థితులపై ఓ బహిరంగ లేఖ రాయడానికి జగన్ నిర్ణయించుకున్నట్లు తెలుస్తోంది. తమ కుటుంబంలో చిచ్చు పెట్టినందుకు కలత చెంది వారిద్దరు రాజీనామాస్త్రాలు సంధించనున్నట్లు తెలుస్తోంది. సొంత పార్టీ పెట్టేందుకే వైయస్ జగన్ నిర్ణయించుకున్నట్లు తెలుస్తోంది. తనకు చెక్ పెట్టేందుకే చిరంజీవిని మంత్రివర్గంలో చేర్చుకుంటున్నారని కూడా ఆయన భావిస్తున్నట్లు సమాచారం. తనను ఈ రకంగా ఒంటరి చేయడానికి, తనను వేధించడానికి పూనుకుందని వైయస్ జగన్ మనస్తాపానికి గురైనట్లు భావిస్తున్నారు.