వైయస్ కుటుంబాల మధ్య చిచ్చు పెట్టింది జగనే: ఆనం పైర్

హైదరాబాద్: దివంగత ముఖ్యమంత్రి వైయస్ రాజశేఖరరెడ్డి కుటుంబంలో చిచ్చు పెట్టింది ఖచ్చితంగా పార్లమెంటు సభ్యత్వానికి, పార్టీకి రాజీనామా చేసిన వైయస్ జగనే అని కాంగ్రెసు పార్టీకి చెందిన శాసనసభ్యుడు ఆనం వివేకానంద మంగళవారం ధ్వజమెత్తారు. వైయస్ అభిమానులందరూ జగన్ రాజీనామాను తప్పు పడుతున్నారన్నారు. పార్టీని విచ్ఛిన్నం చేసే కుట్ర చేసింది జగనే అని ఆరోపించారు. వైయస్ రాజశేఖరరెడ్డి పుట్టింది కాంగ్రెసు లో, పెరిగింది కాంగ్రెసు లో, ఒదిగి ఉంది కాంగ్రెసు లోనే అని తెలుసుకోవాలన్నారు.

పార్టీలో ఐదు నెలల అనుభువం లేకున్నా ముఖ్యమంత్రి పదవి కావాలంటే ఎలా అని ఆయన ప్రశ్నించారు. జగన్ పై సానుభూతితో కాంగ్రెసు వారందరం ముఖ్యమంత్రిగా ప్రతిపాదించిన విషయం ఆయన మరిచిపోయారన్నారు. కాగా పార్టీ అధికారంలోకి వచ్చినప్పటినుండి, కాంగ్రెసు పార్టీలో లాభ పడింది వైయస్ కుటుంబం ఒక్కటేనని మరో నేత షబ్బీర్ అలీ అన్నారు. పార్టీ నాయకురాలు సోనియాగాంధీని విమర్శిస్తే ఊరుకునేది లేదన్నారు. పార్టీ కార్యాలయాలపై దాడి చేస్తే సహించమన్నారు. వైయస్ జగన్ అనుచరులు గుండాయిజానికి పాల్పడుతున్నారని, దాన్ని సహించబోమని ఆయన అన్నారు.