వైయస్ జగన్ ఎఫెక్ట్: జ్యోతిష్కులతో కిరణ్ కుమార్ రెడ్డి సంప్రదింపులు

హైదరాబాద్: పరిస్థితులు విశ్వాసాలను మారుస్తాయనడానికి ప్రస్తుత ముఖ్యమంత్రి ఎన్. కిరణ్ కుమార్ రెడ్డి ఓ ఉదాహరణ. వైయస్ జగన్ ఫ్యాక్టర్ తో ఆయన విశ్వాసం మారినట్లు కనిపిస్తోంది. ముఖ్యమంత్రిగా కిరణ్ కుమార్ రెడ్డి ప్రమాణ స్వీకారం చేసిన ఘడియ మంచిది కాదని జోతిష్య పండితులు టీవీ చానెళ్లలో ఊదరగొట్టారు. మధ్యాహ్నం 12 గంటల లోపు ప్రమాణ స్వీకారం చేయాలని ఆయనకు సూచించారు. జ్యోతిష్యంపై పెద్గగా విశ్వాసం లేని కిరణ్ కుమార్ రెడ్డి ఆ సలహాలను పట్టించుకోలేదు. ఆయన నిర్ణయించుకున్న ప్రకారం మధ్యాహ్నం 12 గంటల 13 నిమిషాలకు ప్రమాణ స్వీకారం చేశారు.

వైయస్ జగన్ పరిణామాల నేపథ్యంలో కిరణ్ కుమార్ రెడ్డి వాస్తు శాస్త్రవేత్తలను సంప్రదించినట్లు సమాచారం. రేపు ముఖ్యమంత్రి కార్యాలయంలో అడుగు పెట్టడానికి సరైన సమయాన్ని చెప్పాలని ఆయన కోరినట్లు తెలుస్తోంది. రేపు ఉదయం 9 గంటల 42 నిమిషాలకు ఆయన సి బ్లాకులోని ఆరు అంతస్థులోని కార్యాలయం ముస్తాబవుతోంది. వాస్తు ప్రకారం దాన్ని తీర్చిదిద్దినట్లు తెలుస్తోంది. ముఖ్యమంత్రిగా ఉన్నప్పుడు కూడా వాస్తు పండితులను సంప్రదించి రోశయ్య కూడా కార్యాలయానికి మార్పులు చేయించుకున్నారు. కానీ ఆయన పదవిని నిలుపుకోలేకపోయారు.