అంబటి రాంబాబు పెట్టిన నాగబాబు ఎమ్మెల్సీ సీటు చిచ్చు

హైదరాబాద్‌: ప్రజారాజ్యం పార్టీ అధ్యక్షుడు చిరంజీవి సోదరుడు నాగబాబు ఎమ్మెల్సీ సీటు వ్యవహారాన్ని తెర మీదికి తెచ్చి వైయస్ జగన్ ముఖ్య అనుచరుడు, కాంగ్రెసు బహిష్కృత నేత అంబటి రాంబాబు చిచ్చు పెట్టారు. చిరంజీవికి చెప్పకుండా తనకు ఎమ్మెల్సీ సీటు ఇవ్వాలని నాగబాబు దివంగత నేత వైయస్సార్ అడిగారని, అందుకు కుటుంబంలో చిచ్చు పెట్టకూడదని వైయస్సార్ తిరస్కరించారని అంబటి రాంబాబు చెప్పారు. దీంతో తీవ్ర వివాదం చెలరేగింది. అంబటి రాంబాబు వ్యాఖ్యలపై ప్రజారాజ్యం పార్టీ శ్రేణులు తీవ్రంగా మండిపడుతున్నాయి. అంబటి రాంబాబు వ్యాఖ్యలకు నాగబాబు కూడా వివరణ ఇచ్చారు. తనకు 2007లో ఎమ్మెల్సీ సీటు ఇవ్వడానికి వైయస్సార్ సిద్ధపడ్డారని, తాను తన బయోడేటా సమర్పించడానికి వెళ్లినప్పుడు వైయస్సార్ ను కలిశానని, తాను ఎమ్మెల్సీ సీటుకు అంగీకరించానని ఆయన చెప్పారు.

అప్పుడు పార్టీ పెట్టే ఆలోచన చిరంజీవి ఇంకా చేయలేదని, తనకు ఎమ్మెల్సీ సీటు ఇస్తామని చెప్పిన విషయాన్ని చిరంజీవికి చెప్పానని, తనకేమీ అభ్యంతరం లేదని చిరంజీవి అన్నారని, చిరంజీవిని కాంగ్రెసులోకి లాగడానికి తనకు ఎమ్మెల్సీ సీటు ఇస్తామంటే తనకు వద్దని కూడా చెప్పానని నాగబాబు వివరించారు. చిరంజీవి అడిగితేనే ఎమ్మెల్సీ సీటు ఇస్తానని వైయస్సార్ తనకు చెప్పారని, తన సోదరుడు చిరంజీవి ప్రభుత్వాన్ని యాచించే పద్ధతిని ఇష్టపడరని తాను చెప్పానని ఆయన అన్నారు. ఈ వివరాలన్నీ చిరంజీవికి తెలుసునని ఆయన చెప్పారు. తనకు, తన సోదరుడు చిరంజీవికి మధ్య చిచ్చు పెట్టేందుకు అంబటి ఆ వ్యాఖ్యలు చేసి ఉండవచ్చునని నాగబాబు అన్నారు.