డిప్యూటీ ముఖ్యమంత్రి పదవి ఉంటుంది: ప్రభుత్వ వివరణ

హైదరాబాద్‌: తెలంగాణ నాయకుల నుంచి తీవ్ర విమర్శలు తలెత్తుతున్న నేపథ్యంలో ఉప ముఖ్యమంత్రి పదవిపై ప్రభుత్వం వివరణ ఇచ్చింది. తెలంగాణకు ఉప ముఖ్యమంత్రి పదవి ఇస్తామని కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీతో పాటు ముఖ్యమంత్రి ఎన్. కిరణ్ కుమార్ రెడ్డి చెప్పారు. అయితే, మంత్రి వర్గ సభ్యుల ప్రమాణ స్వీకారంలో ఆ ప్రస్తావన లేకపోవడంతో విమర్శలు వచ్చాయి. ఉప ముఖ్యమంత్రి పదవి తప్పకుండా ఉంటుందని అధికార వర్గాలు వెల్లడించాయి. ఉప ముఖ్యమంత్రి ప్రత్యేకంగా ప్రమాణ స్వీకారం చేయబోరని, గవర్నర్ నోటిఫికేషన్ లో ఆ విషయం ఉంటుందని ఆ వర్గాలు చెప్పాయి.

కాగా, ఉప ముఖ్యమంత్రి, ప్రదేశ్ కాంగ్రెసు కమిటీ (పిసిసి) చీఫ్, శాసనసభ స్పీకర్ పదవులను ఒకేసారి ఖరారు చేసే అవకాశం ఉంది. మంత్రులకు శాఖలను కేటాయింపునకు ఇంకా సమయం పట్టే అవకాశం ఉంది. శాఖలను కేటాయించిన తర్వాతనే మంత్రివర్గం సమావేశం ఉంటుందని సమాచారం. వారంలోపల ఉప ముఖ్యమంత్రి, స్పీకర్ పదవులు తేలనున్నాయి.