చిన్నాన్న వైయస్ వివేకానంద రెడ్డితో గొడవ జరగలేదు: వైయస్ జగన్

హైదరాబాద్‌: తన చిన్నాన్న వైయస్ వివేకానంద రెడ్డితో గొడవ జరిగినట్లు వచ్చిన వార్తలను వైయస్ జగన్ ఖండించారు. ఈ మేరకు ఆయన బుధవారం సాయంత్రం ఓ పత్రికా ప్రకటన విడుదల చేశారు. కుటుంబ సభ్యుల సమక్షంలో మంగళవారం ఉదయం, సాయంత్రం చర్చలు జరిగిన మాట వాస్తవమేనని, తమ ఇరువురి మధ్య ఏకాభిప్రాయం కుదరకపోవడం వాస్తవమని, ఇంత వరకు వార్త రాస్తే ఫరవా లేదని ఆయన అన్నారు. తమ మధ్య గొడవ, వాగ్వాదం జరిగినట్లు కొన్ని పత్రికలు అన్యాయమైన అభూత కల్పనలు రాయడం శోచనీయమని ఆయన అన్నారు. కొన్ని పత్రికల వార్తలు విస్మయాన్ని కలిగించాయని ఆయన అన్నారు.

తమ మధ్య వాగ్వాదం గానీ గొడవ గానీ జరగలేదని ఆయన చెప్పారు. తమ కుటుంబాన్ని చీల్చడానికి కాంగ్రెసు అధ్యక్షురాలు సోనియా గాంధీ వాడుకోవడం తనకు బాధ కలిగించిన మాట వాస్తవమని ఆయన అన్నారు. చిన్నాన్న అంటే తనకు ఎప్పుడూ గౌరవం ఉందని, ఎప్పుడూ ఉంటుందని ఆయన అన్నారు. తమ చిన్నాన్న వివేకానంద రెడ్డిని తమ కుటుంబ సభ్యుడిగానే పరిగణిస్తానని ఆయన చెప్పారు. వైయస్ వివేకానంద రెడ్డికి, వైయస్ జగన్ కు మధ్య తీవ్ర వాగ్వివాదం చెలరేగినట్లు వార్తలు వచ్చాయి. దీంతో నష్టనివారణ చర్యగా వైయస్ జగన్ వ్యూహాత్మకంగా ఈ ప్రకటన వెలువరించినట్లు కనిపిస్తోంది.