జగన్ తో స్నేహానికి బిజెపి తహతహ, ప్రయత్నాలు మొదలు

హైదరాబాద్‌: కొత్త పార్టీ పెట్టడానికి రంగం సిద్ధం చేసుకుంటున్న వైయస్ జగన్ తో పొత్తులకు భారతీయ జనతా పార్టీ (బిజెపి) తహతహలాడుతోంది. ఆంధ్రప్రదేశ్ నుంచి ఎక్కువ పార్లమెంటు సీట్లు లభిస్తే తప్ప కేంద్రంలో అధికారంలోకి రాలేని స్థితి ఉండడంతో బిజెపి నాయకులు ఇటు వైయస్ జగన్ వైపు, అటు తెలుగుదేశం పార్టీ అధ్యక్షుడు నారా చంద్రబాబు నాయుడి వైపు చూస్తున్నట్లు వార్తలు వస్తున్నాయి. చంద్రబాబుతో స్నేహానికి బిజెపి నాయకులు ఇప్పటికే సంకేతాలు పంపారు. ఇటీవల హైదరాబాద్ వచ్చిన బిజెపి నేత అరుణ్ జైట్లీ బహిరంగంగానే చంద్రబాబుకు ఆహ్వానం పలికారు. అయితే, దీనిపై చంద్రబాబు ఏమీ మాట్లాడడం లేదు. ఇంకా చాలా సమయం ఉంది కదా అనే ధోరణితో వ్యవహరిస్తున్నారు. తమతో పొత్తు పెట్టుకుంటి ముస్లింల ఓట్లు పోతాయనే చంద్రబాబు వైఖరికి విరుగుడు కూడా బిజెపి సూచిస్తోంది. బీహార్ లో తమతో పొత్తు పెట్టుకున్నప్పటికీ నితీష్ కుమార్ కు ముస్లింలు ఓటు వేశారని చెబుతోంది.

ఇదిలా వుంటే, కొత్తగా పుట్టుకొస్తున్న వైయస్ జగన్ శక్తిని కూడా తమ వైపు లాక్కునేందుకు ప్రయత్నాలు మొదలు పెట్టింది. తమ పార్టీకి చెందిన కర్ణాటక మంత్రి గాలి జనార్దన్ రెడ్డితో వైయస్ జగన్ కు మంచి సంబంధాలున్నాయి. గాలి జనార్దన్ రెడ్డి ద్వారా వైయస్ జగన్ తో స్నేహానికి బిజెపి ప్రయత్నాలు మొదలు పెట్టినట్లు సమాచారం. ఇందులో భాగంగానే మొదటి నుంచి కూడా రాష్ట్ర బిజెపి నాయకులు వైయస్ జగన్ పై విమర్సలు చేయడం లేదు. చంద్రబాబు, ఇతర తెలుగుదేశం నాయకులు జగన్ ను టార్గెట్ చేసి దుమ్మెత్తిపోసినా బిజెపి నాయకులు మాట్లాడలేదు. వైయస్ జగన్ తో స్నేహం చేయడం ద్వారా ఎక్కువ లోకసభ సీట్ల మద్దతు తమకు లభిస్తుందని బిజెపి భావిస్తోంది.