కాంగ్రెసు రాజకీయాలపై చంద్రబాబు పార్టీ నాయకులకు క్లాస్

హైదరాబాద్‌: కాంగ్రెసు రాజకీయాలపై తెలుగుదేశం పార్టీ అధ్యక్షుడు నారా చంద్రబాబు నాయుడు తన పార్టీ నాయకులకు క్లాస్ చెప్పారు. కాంగ్రెసు మార్కు రాజకీయాలు ఎలా ఉంటాయి, వాటిని ఎలా ఎదుర్కోవాలనే విషయంపై ఆయన క్షుణ్నంగా వివరించారు. పార్టీ అధికార ప్రతినిధులు, ప్రధాన కార్యదర్శుల సమావేశంలో ఆయన తాను కాంగ్రెసులో ఉన్నప్పుడు పొందిన అనుభవాలను, చిత్తూరు జిల్లా రాజకీయాలను ఆయన వివరించారు. ముఖ్యమంత్రి కిరణ్ కుమార్ రెడ్డితో పాటు చంద్రబాబు కూడా చిత్తూరు జిల్లాకు చెందినవారే కావడం విశేషం. చిత్తూరు జిల్లా రాజకీయాల్లో తాను కిరణ్ కుమార్ రెడ్డి తండ్రి అమర్నాథ్ రెడ్డిని ఎలా ఎదుర్కుందీ, ఆయనను రాజకీయంగా ఎలా దెబ్బ తీసిందీ చంద్రబాబు వివరించారు.

పనిలో పనిగా చంద్రబాబు తన రాజకీయానుభవాలను పార్టీ నాయకులతో పంచుకున్నారు. తాను కాంగ్రెసులో ఉన్నప్పుడు కిరణ్ కుమార్ రెడ్డి తండ్రి అమర్నాథ్ రెడ్డికి పోటీగా దింపి కుతూహలమ్మను ఎలా జిల్లా పరిషత్ చైర్ పర్సన్ చేసిందీ వివరించారు. కిరణ్ కుమార్ రెడ్డి కన్నా అమర్నాథ్ రెడ్డే మంచివాడని ఆయన కితాబు ఇచ్చారు. జాతీయ రాజకీయాల గురించి కూడా ఆయన తన పార్టీ నాయకులకు చెప్పారు. ప్రధానిగా తనకు అవకాశం వచ్చినా ఎందుకు వదులుకున్నదీ ఆయన చెప్పారు. ఏ మాత్రం వెనక్కి తగ్గకుండా కాంగ్రెసు రాజకీయాలను ఎదుర్కోవాలని ఆయన పార్టీ నాయకులకు ధైర్యం నూరిపోశారు.