పెద్దిరెడ్డి వ్యాఖ్యలు అధిష్టానం ధిక్కరింపు: గల్లా అరుణకుమారి

హైదరాబాద్: ముఖ్యమంత్రి కిరణ్ కుమార్ రెడ్డిపై, ప్రభుత్వంపై పెద్దిరెడ్డి రామచంద్రారెడ్డి చేసిన వ్యాఖ్యలు అధిష్టానాన్ని ధిక్కరించడం క్రిందకే వస్తుందని మంత్రి గల్లా అరుణకుమారి శుక్రవారం విలేకరుల సమావేశంలో అన్నారు. అనుచిత వ్యాఖ్యలు చేసిన పెద్దిరెడ్డిపై అధిష్టానం, ప్రదేశ్ కాంగ్రెసు కమిటీ చూసుకుంటుందని ఆమె చెప్పారు. దానిపై తానేమి చెప్పనన్నారు. ముఖ్యమంత్రి కిరణ్ కుమార్ రెడ్డి మాత్రమే కాకుండా ఆయన తండ్రి అమరనాథ్ రెడ్డి కూడా జిల్లా అభివృద్ధిలో పాలు పంచుకుంటున్నారన్నారు.

జిల్లాకు చెందిన ముఖ్యమంత్రి ఉన్నప్పుడు ఆయనకు సహకరించి జిల్లాను అభివృద్ధి పరచాలని సూచించారు. ఎవరిపైనా ఎలాంటి వ్యాఖ్యలు చేయమని అంతా అధిష్టానం చూసుకుంటుందన్నారు. తామంతా అధిష్టానం చెప్పినట్టే నడుచుకుంటామని, అధిష్టానాన్ని కాదని ఏం చేయలేమన్నారు. కాగా పెద్దిరెడ్డి వ్యాఖ్యలపై అధిష్టానానికి ఫిర్యాదు చేస్తానని మాజీ శాసనమండలి సభ్యుడు ఎన్సీవి నాయుడు అన్నారు.