రక్తచరిత్ర -2లో స్వామి పాత్ర కెవిపి రామచందర్ రావుదా?

హైదరాబాద్‌: రామ్ గోపాల్ వర్మ రక్తచరిత్ర -2లో స్వామి పాత్ర దివంగత నేత వైయస్ రాజశేఖర రెడ్డి ప్రియ మిత్రుడు కెవిపి రామచందర్ రావుదనే అనుమానాలు వ్యక్తమవుతున్నాయి. పరిటాల రవి పాత్ర ప్రతాప్ రవి హత్యలో సూత్రధారిగా స్వామిని రామ్ గోపాల్ వర్మ చూపించారు. దివంగత నేత వైయస్సార్ పాత్ర ఈ భాగంలో లేదు. పరిటాల రవి హత్య వెనక పోలీసుల పాత్రను గానీ ప్రభుత్వ పాత్రను గానీ రామ్ గోపాల్ వర్మ చూపించలేదు. ప్రతాప్ రవికి పార్టీ అండదండలు క్రమంగా తగ్గిపోతూ వస్తుంటాయి. ఎన్టీఆర్ పాత్రగా భావిస్తున్న శివాజీ రావు చాప్టర్ ఈజ్ ఓవర్ అనడంతో ప్రతాప్ రవికి అండదండలు కొరవడతాయి. మద్దెలచెర్వు సూరిగా పరిగణిస్తున్న సూర్య పోషించిన పాత్ర, ప్రియమణి పోషించిన ఆయన భార్య భానుమతి పాత్ర ఎదుటే టీవీ బాంబు పేలి కుటుంబ సభ్యులు మరణిస్తారు. దీంతో మద్దెలచెర్వు సూరిలో పగ ప్రజ్వరిల్లుతుంది. అంత వరకు సూరి పాత్రలో మానవీయ కోణాలను రామ్ గోపాల్ వర్మ చూపించారు.

మద్దెలచెర్వు సూరితో ఆయన భార్య భానుమతిని పోటీకి దించే ఒప్పందం జైల్లోనే కుదురుతుంది. భానుమతిని చంపడానికి పరిటాల రవి పాత్ర వెనకాడుతుంది. ఈలోగా ప్రతాప్ రవి ముఖ్య అనుచరుడు హత్యకు గురవుతాడు. దీంతో ప్రతాప్ రవిలో ప్రతీకారం పెరుగుతుంది. ఇక్కడి నుంచి ప్రతాప్ రవిలో విలన్ లక్షణాలు కనిపిస్తాయి. ప్రతాప్ రవిని సూర్య పాత్ర హత్య చేస్తుంది. దాన్ని మొద్దు శీను తన మీద వేసుకుని టీవీలకు ఇంటర్వ్యూలు ఇచ్చినట్లుగా రామ్ గోపాల్ వర్మ చూపించారు. వైయస్సార్ పాత్రను ఎక్కడా ఆయన చూపించలేదు. ప్రతాప్ రవి హత్యకు గురైనప్పుడు స్వామి పగలబడి నవ్వడాన్ని చూపించారు. దీన్ని కెవిపి పాత్రగా ప్రేక్షకులు అన్వయించుకుంటున్నారు. కాగా, సినీ హీరోకు గుండు గీయించే సీన్ సినిమాలో లేదు. ఈ సీన్ ఉంటుందేమోనని సర్వత్రా ఉత్కంఠ నెలకొంది.