జగన్ ఫ్యాక్టర్ కాదు: శాఖ కేటాయింపుపై మంత్రి కోమటిరెడ్డి

హైదరాబాద్: మాజీ పార్లమెంటు సభ్యుడు వైయస్ జగన్మోహన్ రెడ్డి, దివంగత ముఖ్యమంత్రి వైయస్ రాజశేఖరరెడ్డి అభిమాన వర్గాన్ని నిర్వీర్యం చేయడానికే కొందరికి మంత్రివర్గంలో ముఖ్యమంత్రి కిరణ్ కుమార్ రెడ్డి ప్రాధాన్యం లేని శాఖలు కేటాయించినట్లు వచ్చిన వార్తల్లో ఏ మాత్రం నిజం లేదని మంత్రి కోమటిరెడ్డి వెంకటరెడ్డి విలేకరులతో శుక్రవారం పేర్కొన్నారు. నాకు కేటాయించిన శాఖపై నాకెలాంటి అసంతృప్తి లేదన్నారు. ముఖ్యమంత్రి నాకు అప్పగించిన శాఖను సమర్థవంతంగా నిర్వహిస్తానన్నారు.

ముఖ్యమంత్రి నన్ను గౌరవించే ఎవ్వరికీ ఇవ్వని ఈ శాఖను నాకు ఇచ్చారని చెప్పుకొచ్చారు. మంత్రి జానారెడ్డితో నాకు ఎలాంటి శతృత్వమూ లేదని చెప్పారు. కాంగ్రెస్ పార్టీ తెలంగాణకు కట్టుబడి ఉందన్నారు. తెలంగాణ రాకుంటే మా ప్రణాళిక మాకుందని చెప్పారు. 2011లో తెలంగాణ ప్రక్రియ తప్పకుండా ప్రారంభమవుతుందని ఆయన చెప్పారు. అందరమూ ఆశావహులమేనని ఆయన పేర్కొన్నారు.