తొలి షాక్: జగన్ యువసేన అధ్యక్షుడు సత్యారెడ్డి తిరుగుబాటు

హైదరాబాద్‌: కొత్త పార్టీ పెట్టడానికి రంగం సిద్ధం చేసుకుంటున్న వైయస్ జగన్ కు తొలి షాక్ తగిలింది. జగన్ యువసేనను రద్దు చేస్తున్నట్లు ఆ సంస్థ అధ్యక్షుడు సత్యారెడ్డి ప్రకటించారు. తమకు చెప్పకుండా వైయస్ జగన్ రాజీనామా చేయడాన్ని ఆయన తప్పు పట్టారు. వైయస్ జగన్ మంచివారేనని, జగన్ పక్కన ఉన్న అంబటి రాంబాబు సరైనవారు కారని ఆయన అంటున్నారు. తమకు జగన్ ను కలిసే అవకాశం కల్పించడం లేదని ఆయన అన్నారు. వైయస్ జగన్ మంచివారని, మంచి నేత అని, జగన్ పక్కన ఉన్నవారే చెడగొడుతున్నారని ఆయన అన్నారు. కార్యకర్తలకు జగన్ అపాయింట్ మెంటు లభించకుండా అంబటి రాంబాబు చూస్తున్నారని ఆయన విమర్సించారు.

వైయస్ రాజశేఖర రెడ్డి ఉన్నప్పుడు తాము రాజకీయాలతో సంబంధం లేకుండా తమంత తాము జగన్ యువసేనను ఏర్పాటు చేశామని, దీంతో వైయస్ జగన్ కు సంబంధం లేదని ఆయన అన్నారు. తాము కాంగ్రెసులోనే ఉన్నామని, కొనసాగుతున్నామని ఆయన చెప్పారు. ముఖ్యమంత్రి కిరణ్ కుమార్ రెడ్డిని తాము కలుస్తున్నామని ఆయన చెప్పారు. టీవీల్లో చూసే వరకు తమకు వైయస్ జగన్ రాజీనామా విషయం తెలియలేదని ఆయన ఆవేదన వ్యక్తం చేశారు. వైయస్ జగన్ ప్రత్యక్ష రాజకీయాల్లోకి రావాలని ఆశించామని ఆయన చెప్పారు.