సీనియర్ మంత్రుల తీరుపై మంత్రి మహీధర్ రెడ్డి ఆక్షేపణ

హైదరాబాద్: సినీయర్ మంత్రుల తీరుపై మున్సిపల్ శాఖ మంత్రి మహీధర్ రెడ్డి తీవ్ర ఆక్షేపణ తెలియజేశారు. ముఖ్యమైన శాఖను చేపట్టడానికి తనకు లేని అర్హత ఏమిటని ఆయన అడిగారు. తాను మూడు సార్లు శాసనసభ్యుడిగా గెలిచానని, తనకు విద్యాపరంగా రాజకీయంగా నేపథ్యం ఉందని ఆయన శనివారం మీడియా ప్రతినిధుల సమావేశంలో అన్నారు. ఇంతకు ముందు తనకన్నా చిన్నవాళ్లకు మంత్రి పదవులు ఇచ్చినా తాను మాట్లాడలేదని ఆయన చెప్పారు. ముఖ్యమంత్రి నిర్ణయానికి తాను కట్టుబడి ఉంటానని ఆయన చెప్పారు.

తాను 22 ఏళ్లుగా రాజకీయాల్లో ఉన్నట్లు ఆయన తెలిపారు. తనకిచ్చిన శాఖను సమర్థంగా నిర్వహించి తనపై వస్తున్న విమర్శలకు సమాధానం ఇస్తానని ఆయన చెప్పారు. మంత్రులను జూనియర్లు, సీనియర్లు అనడం సరి కాదని ఆయన అభిప్రాయపడ్డారు. మహిళా రిజర్వేషన్లు, బిసి జనాభా గణన పూర్తయిన తర్వాత మున్సిపల్ ఎన్నికల గురించి ఆలోచిస్తామని ఆయన చెప్పారు. అవినీతిని తన శాఖలో ఏ మాత్రం సహించబోనని ఆయన హెచ్చరించారు.